Ուկրաինան հաստատել է ԶՈւ կարիքների համար Թուրքիայից 35 մլն դոլարի օգնության համաձայնագիրը

Հունիսի 25-ին Ուկրաինայի Կառավարությունը վավերացրել է Թուրքիայի հետ ռազմա-ֆինանսական համագործակցության և օգնության վերաբերյալ համաձայնագիրը, որով նախատեսվում է երկրի զինված ուժերի կարիքների համար Թուրքիայից 205 մլն թուրքական լիրա (~35 մլն ԱՄՆ դոլար) օգնություն ստանալ:

Այս մասին հայտնում է ուկրաինական Корреспондент.net լրատվակայքը:

Հատկացված միջոցները նախատեսվում է օգտագործել Ուկրաինայի զինված ուժերի համար որոշ ապրանքների և ծառայությունների գնման, ինչպես նաև առաջիկա հինգ տարիների ընթացքում Թուրքիայի ԶՈւ ուսումնական կենտրոններում ուկրաինացի զինվորականներին ուսումնառության ուղարկելու համար:

Ռ. Էրդողան և Վ. Զելենսկի
Ռեջեփ Թայիփ Էրդողան և Վլադիմիր Զելենսկի

Վերոհիշյալ համաձայնագիրը 2020 թ. փետրվարի 3-ին ստորագրել էին նախագահներ Վլադիմիր Զելենսկին և Ռեջեփ Թայիփ Էրդողանը՝ Կիևում կայացած Թուրքիա-Ուկրաինա բարձրաստիճան ռազմավարական խորհրդի 8-րդ համաժողովի ժամանակ:

Նշենք, որ Թուրքիա-Ուկրաինա բարձրաստիճան ռազմավարական խորհուրդը ստեղծվել է 2011 թ․՝ կողմերի միջև համագործակցությունը զարգացնելու նպատակով։ Նմանատիպ խորհուրդներ ստեղծվել են Թուրքիայի և նրա մի շարք հարևանների միջև։

Հավելենք, որ 2019 թ. մարտին Ուկրաինայի զինուժը համալրվել է թուրքական արտադրության «Բայրաքթար» (Bayraktar TB2) հարվածային անօդաչու թռչող սարքերով (ԱԹՍ)։ Իսկ նույն թվականի ապրիլին ուկրաինական «Սպեցտեխնոէքսպորտը» մի քանի պայմանագրեր է կնքել թուրքական Aselsan և MKEK ռազմարդյունաբերական ընկերությունների հետ, որոնցով Ուկրաինան նախատեսում էր ստանալ հակատանկային միջոցների համար ջերմադիտարկման սարքեր և ռադիոկապի միջոցներ, իսկ Թուրքիան՝ 120 մմ տրամաչափի «Կոնուս» հակատանկային կառավարվող հրթիռներ։

2019 թ․ օգոստոսին էլ Ուկրաինայում հիմնադրվել է թուրք-ուկրաինական Black Sea shield ձեռնարկությունը, որի մշակած ուկրաինական ԱԻ-450Տ շարժիչներով 2019 թ. նոյեմբերին փորձարկվեց թուրքական «Աքընջը» հարվածային ԱԹՍ-ն։

Մեկնաբանել

Ձեր էլ. փոստի հասցեն չի հրատարակվելու: Պարտադիր դաշտերը նշված են *