Հունիսի 11-ին ԱՄՆ Կոնգրեսը, համաձայն ԱՄՆ պաշտպանության նախարարության՝ Պենտագոնի առաջարկի, հաստատել է 2020 թ. ֆիսկալ տարվա համար Ուկրաինայի ռազմական օգնության փաթեթը։ 250 միլիոն դոլար արժողությամբ փաթեթը տրվում է «Ուկրաինայի անվտանգության աջակցության նախաձեռնություն» (USAI) ծրագրի շրջանակներում:
Այս մասին տեղեկանում ենք Ուկրաինայում ԱՄՆ դեսպանատան կայքէջից։
Մինչ օրս նշված գումարի կեսի (125 միլիոն դոլար) բաշխումը կախված էր ԱՄՆ Կոնգրեսում «պաշտպանական և հակակոռուպցիոն ոլորտների առանցքային բարեփոխումներում Ուկրաինայի առաջընթացը» վկայակոչելու անհրաժեշտությունից, ինչն էլ արվել է ԱՄՆ պաշտպանության նախարարության կողմից:
Օգնության փաթեթով նախատեսվում է, որ Ուկրաինան ձեռք կբերի ծովային, օդային պաշտպանության և վերահսկողության միջոցներ, ինչպես նաև կիբերանվտանգությունն ապահովելու և կիբերհարձակումներին ու ապատեղեկատվությանը հակազդելու միջոցներ:
Դեռևս 2019 թ. օգոստոսին հայտնի էր դարձել, որ ԱՄՆ նախագահ Դոնալդ Թրամփի վարչակազմը հապաղում է 250 միլիոն դոլարի ռազմական օգնությունը Ուկրաինային հատկացնելու հարցում։ Նախագահ Թրամփն իր ազգային անվտանգության թիմին խնդրել էր վերանայել ֆինանսավորման ծրագիրը, որպեսզի գումարն օգտագործվի առավելագույնս Միացյալ Նահանգների շահերից ելնելով։