Կանադայի թագավորական ռազմաօդային ուժերը ստացել են իրենց առաջին ծանր մարտական-ուղևորատար «Չինուք CH-47F» ուղղաթիռը։
«Չինուքի» այս տիպի առաջին ուղղաթիռը հունիսի վերջին տրամադրվել է Հյուսիսային Օնտարիոյի Փեթավավա շրջանում գտնվող մարտավարական ուղղաթիռների ռազմաբազային։
Կանադան «Բոինգ» ընկերության հետ կնքել է 15 միավոր «Չինուք CH-47F» ուղղաթիռ ձեռք բերելու պայմանագիր։ Ամերիկյան ընկերությունը նախատեսում է մինչ տարեվերջ ևս 6 ուղղաթիռ փոխանցել Կանադային, իսկ մինչ 2014 թվականի ամառը կտրամադրվի մնացած 8 «Չինուքը», տեղեկացնում է Jane’s-ը։
Չինուք CH-47F
Նշենք, որ «Չինուք CH-47F» (CH-47F Chinook) ծանր ուղևորա-բեռնափոխադրող ուղղաթիռների արտադրությամբ զբաղվում է «Բոինգ» (Boeing) ընկերությունը։
«Չինուք» սերիայի առաջին ուղղաթիռները սկսել են թռիչքներ կատարել 60-ականների սկզբին։ Հետագա տարիներին «Չինուքը» ենթարկվել է մշտական կատարելագործումների և արդիականացման։ «Չինուք-CH-47F» ուղղաթիռը ներկայացվել է 2006 թվականին։
Վերջերս հայտնի էր դարձել , որ ԱՄՆ պաշտպանական գերատեսչությունը պայմանագիր է կնքել «Բոինգ» ընկերության հետ, որով ձեռք է բերելու 117 «Չինուք-CH-47F» ուղղաթիռ։
Ներկայում աշխարհում տարբեր պետությունների սպառազինության մեջ է գտնվում է CH-47 տեսակի 800-ից ավել ուղղաթիռ, որից 528 միավորը բաժին է հասնում ԱՄՆ-ին։
Ավելի վաղ նշվում էր «Չինուք CH-47F»-ի նկատմամբ Թուրքիայի և ԱՄԷ-ի հետաքրքրության մասին։