Վրաստանի վարչապետ Գեորգի Գախարիան ծանոթացել է Փոթիում պատմական շենքի վերանորոգման աշխատանքներին, որտեղ հաջորդ տարի կսկսի գործել Բաթումիի ռազմածովային ակադեմիայի մասնաճյուղը։
Այս մասին հայտնում է Վրաստանի կառավարության կայքը:
Վարչապետ Գախարիան խոստացել է աջակցել ակադեմիային, որն առաջին փուլում կենտրոնանալու է մասնագիտական կրթության և երկրի լոգիստիկ կենտրոններին համապատասխան կադրեր տրամադրելու վրա։
Սամեգրելո-Զեմո Սվանեթիի նահանգապետ Ալեքսանդր Մոզերլիան նշել է, որ ռազմածովային ուսումնարանը, որտեղ աշխատելու է 250 ուսուցիչ, և ուսանելու են հազարավոր երիտասարդներ, կառուցվում է անվտանգության բոլոր միջոցառումներին համապատասխան։
Ըստ Վրաստանի ծովային տրանսպորտի գործակալության տնօրեն Թամար Իոսելիանիի՝ շենքի նորոգման աշխատանքները կավարտվեն ինը ամսից, իսկ ուսումնական գործընթացը կսկսվի 2021 թ.-ին:
Նշենք, որ ռազմածովային ուսումնարանը տեղակայվելու է Փոթիի ոռոգման և ջրահեռացման վարժարանի նախկին շենքում: Իշխանությունները պլանավորում են, որ ուսումնական հաստատությունը կօգնի նոր աշխատատեղերի ստեղծմանն ու կապահովի երիտասարդների մնալը քաղաքում: