Իրանում մատակարարումներից առաջ վերջին փորձարկումներն են անցնում ռուսական Տ-90 տանկերի իրանական տարբերակը, որոնք ըստ իրանական հայտարարությունների՝ ավելի բազմաֆունկցիոնալ են, քան իրանական արտադրության մյուս տանկերը։
Այս մասին ապրիլի 16-ին հայտարարել է Իրանի ԶՈւ ցամաքային զորքերի հրամանատար բրիգադային գեներալ Քիոմարս Հեյդարին, փոխանցում է իրանական «Թասնիմ» գործակալությունը։
Ըստ Հեյդարիի՝ տանկերի մատակարարումը ցամաքային ուժերին նախատեսում են այս տարվա սեպտեմբեր֊հոկտեմբեր ամիսներին։
Հիշեցնենք, որ 2015թ․ տեղեկություններ տարածվեցին, որ Իրանը պատրաստվում է Ռուսաստանից Տ-90 տանկեր գնել, սակայն ավելի ուշ Իրանը հայտարարեց, որ հետաքրքրված չէ ռուսական տանկերով և իր սեփական տանկերն է արտադրելու։
Ավելին՝ 2017թ․ Իրանում պաշտոնապես ներկայացվեց տեղական արտադրության «Քարրար» տանկը, որն, ըստ արտադրողների, չի զիջում ռուսական տանկերին և ամբողջովին կարող է բավարարել Իրանի ԶՈւ կարիքները։
Այնուհետ կարծիքներ քննարկվեցին, թե «Քարրար» տանկերն արտադրված են ռուսական Տ-72 տանկերի օրինակով, որոնցից կա նաև Իրանի սպառազինությունում։
Նշենք նաև, որ իրանական արտադրության տանկերից է նաև «Զոլֆաղարը» , որը Իրանի ԶՈւ-ն շահագործում է 1997 թվականից։