ԱՄՆ-ն կարող է առաջիկայում Թուրքիային փոխանցել «Չինուք-CH-47F» ուղղաթիռները

Միացյալ Նահանգները պատրաստվում է առաջիկայում Թուրքիային փոխանցել  «Չինուք-CH-47F» (Boeing CH-47F Chinook) ուղղաթիռները։

Այս մասին տեղեկացնում է Jane’s-ը՝ հղում կատարելով ԱՄՆ-ի Պաշտպանության դեպարտամենտի (DoD) տարածած հաղորդագրությանը։

Հաղորդագրության մեջ հստակ չի նշվում, թե թուրքական կողմը քանի ուղղաթիռ ձեռք բերելու պայմանագիր է կնքել ամերիկացիների հետ և որքան են դրանք արժեցել Անկարային։

Չինուք CH-47F

Նույն աղբյուրը նաև նշում է, որ «Չինուք-CH-47F» ուղղաթիռներ ձեռք բերելու հայտ է ներկայացրել նաև Արաբական Միացյալ Էմիրությունները, սակայն քանակի և պայմանագրի արժեքի վերաբերյալ տվյալներ կրկին չեն նշվում։

Jane’s-ը հավելում է, որ ավելի վաղ հայտնի է դարձել թուրքական կողմի՝  1,2 մլրդ դոլար արժողությամբ 14 «Չինուք» ուղղաթիռ ձեռք բերելու մտադրության մասին։

Նշենք, որ «Չինուք-CH-47F» ծանր ուղևորափոխադրող ուղղաթիռների արտադրությամբ զբաղվում է «Բոինգ» (Boeing) ընկերությունը։

«Չինուք» սերիայի առաջին ուղղաթիռները սկսել են թռիչքներ կատարել 60-ականների սկզբին։ Հետագա տարիներին «Չինուքը» ենթարկվել է մշտական կատարելագործումների և արդիականացման։

Ներկայում աշխարհում տարբեր պետությունների սպառազինության մեջ է գտնվում է CH-47 տեսակի 807 ուղղաթիռ, որից 528 միավորը բաժին է հասնում ԱՄՆ-ին։ «Չինուք-CH-47F» ուղղաթիռը ներկայացվել է 2006 թվականին։

Վերջերս հայտնի էր դարձել , որ ԱՄՆ պաշտպանական գերատեսչությունը պայմանագիր է կնքել «Բոինգ» ընկերության հետ, որով ձեռք է բերելու 117  «Չինուք-CH-47F» ուղղաթիռ։

Հավելենք նաև, որ ներկայում Թուրքիայի զինված ուժերի սպառազինության մեջ կան «Չինուք CH-47» տեսակի, սակայն այլ տարբերակների ուղղաթիռներ։