Այսօր՝ հունվարի 30–ին, Ռուսաստանի Հարավային ռազմական շրջանի ենթակայության Կասպյան նավատորմիղը համալրվել է «Բալ» առափնյա հրթիռային համալիրով։ Տեխնիկայի փոխանցման արարողությունը եղել է Դաղստանում։
Այս մասին հայտնում է ՌԴ ՊՆ կայքը։
Նշենք, որ «Բալ» հրթիռային համալիրները մարտական հերթապահության են դրված նաև Հարավային ռազմական շրջանի ենթակայության մյուս՝ Սևծովյան նավատորմում։ Ըստ ՌԴ ՊՆ հայտարարած տվյալների՝ Խ-35 հականավային հրթիռներով զինված համակարգը կարող է թիրախին խոցել առավելագույնը 120 կմ հեռավորության վրա։
Կասպյան նավատորմիղի կազմում ընդգրկված են հրթիռային պարեկանավեր, փոքր հրթիռային և հրետանային նավեր, հրթռիային և հրետանային կատերներ, դեսանտային նավեր, ականազերծող նավեր, ծովային հետևակի և առափնյա անվտանգության հրետանային զորքերի ստորաբաժանումներ։ Նավատորմիղը նաև Սիրիական պատերազմի փորձ ունի՝ նավատորմիղի «Դաղստան», «Գրադ Սվիյաժսկ», «Ուգլիչ», «Վելիկիյ Ուստյուգ» ռազմանավերը Կասպից ծովի ջրերից «Կալիբր» հրթիռներով հարվածել են Սիրիայում ԻՊ դիրքերին։