Հունվարի 7-ի լույս 8-ի գիշերը Իրանի Իսլամական հեղափոխության պահապանների կորպուսը (ԻՀՊԿ), որպես այդ կառույցի նախկին հրամանատար Ղասեմ Սոլեյմանիի սպանության պատասխան, բալիստիկ հրթիռներով հարվածել է Իրաքում տեղակայված ամերիկյան երկու ռազմաբազայի։
ԻՀՊԿ հարվածների թիրախներն Իրաքի արևմտյան Ալ Անբար շրջանի Այն ալ Ասադ ավիամաբազան և Իրաքյան Քրդստանի կենտրոն Էրբիլում տեղակայված մեկ այլ ռազմաբազան են եղել։
Կորուստների մասին առայժմ միայն իրանական տվյալներ են (~30/80), որոնք անհուսալի են, ամերիկյան կողմը դեռևս հաստատել է, որ հարվածներ իրենց ռազմաբազաներին եղել են, սակայն կորուստների մասին տեղեկություն չկա։
Իրանական կողմը սպառնում է, որ եթե ԱՄՆ-ն փորձի պատասխան հարվածներ հասցնել, ապա Իրանը հարվածելու է ամերիկյան այլ թիրախների։
Իրանական պետական IRNA լրատվական գործակալությունը գրում է, որ ԻՀՊԿ հարվածներից այրվել է ամերիկյան ռազմաբազաներում տեղակայված ավիացիայի մի մասը։ Այս տեղեկությունը ևս հաստատված չէ։
ԱՄՆ նախագահ Դոնալդ Թրամփն իր թվիթերյան էջում անդրադարձել է ամերիկյան ռազմաբազաների վրա հարձակումներին և գրել․ «Ամեն ինչ լավ է։ Իրանից արձակված հրթիռները հարվածել են Իրաքում տեղակայված երկու ռազմաբազայի վրա։ Այժմ գնահատվում են կորուստների և վնասների չափերը։ ․․․ Վաղն առավոտյան պաշտոնական հայտարարություն կանեմ»։
Ուշագրավ է, որ այսօր առավոտյան, ԻՀՊԿ հարվածներից հետո, Թեհրանում վթարվել է Կիև ուղևորվող ուկրաինական Բոինգ–787-800 քաղաքացիական ինքնաթիռը, որի անձնակազմն ու ուղևորները մահացել են։ Ուղևորների թիվն, ըստ տարբեր տվյալների, տատանվում է 167-180-ի շրջանակներում։
Ռուսական «Մեդուզա» գործակալությունը կասկածի տակ է դնում՝ արդյո՞ք այս երկու իրադարձությունները կապված են միմյանց, թե՝ ոչ։
Հիշեցնենք, որ հունվարի 3-ին Իրաքի մայրաքաղաք Բաղդադի միջազգային օդանավակայանի մոտակայքում ամերիկյան ուժերի ավիահարվածներից սպանվել էր Իրանի Իսլամական հեղափոխության պահապանների կորպուսի (ԻՀՊԿ) Ղոդս ստորաբաժանման հրամանատար գեներալ-մայոր Ղասեմ Սոլեյմանին և Իրաքի Հաշդ-ալ-Շաաբի ուժերի հրամանատար Աբու Մահդի ալ-Մուհանդիսը:
Սոլեյմանին հուղարկավորվել է այսօր՝ հունվարի 8-ի առավոտյան, իր ծննդավայր Քերմանի շրջանում։