ԱՄՆ֊ն հորդորում է իր քաղաքացիներին լքել Իրաքը․ ԱՄՆ դեսպանատուն

Հունվարի 3-ին, Իրանի ԻՀՊԿ Ղոդս ստորաբաժանման հրամանատար Ղասեմ Սոլեյմանիի սպանությունից հետո, Իրաքում ԱՄՆ դեսպանատունը հայտարարություն է տարածել, որտեղ հորդորում է իր քաղաքացիներին հնարավորինս արագ լքել Իրաքի տարածքը։

Հայտարարությունը տեղադրված է Իրաքում ԱՄՆ դեսպանատան պաշտոնական կայքում։ Նշվում է, որ ԱՄՆ բոլոր հյուպատոսություններն Իրաքի տարածքում փակ են, դեսպանատանը չպետք է դիմել, վիզայի և այլ հարցերի համար բաց կլինի միայն Էրբիլում (Իրաքյան Քրդստանում) ամերիկյան հյուպատոսարանը։

Դեսպանատանը պնդում են, որ պետք է այդ երկրից անմիջապես հեռանալ օդային ճանապարհով, իսկ եթե դա հնարավոր չէ՝ գնալ այլ հարևան երկրներ՝ ցամաքով։

Բացի այդ՝ ԱՄՆ֊ն հորդորում է իր քաղաքացիներին մշտադիտարկման տակ պահել համաշխարհային մեդիան զարգացումներին տեղյակ լինելու համար։

Հիշեցնենք, որ հունվարի 3-ին Բաղդադի օդանավակայնի մոտակայքում ամերիկյան ուժերի ավիահարվածներից սպանվել էին ԻՀՊԿ Ղոդս ստորաբաժանման հրամանատար գեներալ֊մայոր Ղասեմ Սոլեյմանին և Իրաքում Իրանի հովանավորությամբ գործող Հաշդ ալ֊Շաաբի ուժերի հրամանատար Աբու Մահդի ալ-Մուհանդիսը։

Ավելի վաղ՝ դեկտեմբերի 31-ին Իրաքի շիայական ուժերը ցույց էին կազմակերպել ԱՄՆ դեսպանության դիմաց, ապա փորձել հարձակվել դեսպանատան վրա, ամերիկյան կողմը կարողացել էր էվակուացնել բոլոր աշխատակիցներին, իսկ ցուցարարների դեմ կիրառվել էր արցունքաբեր գազ։

Մեկնաբանել

Ձեր էլ. փոստի հասցեն չի հրատարակվելու: Պարտադիր դաշտերը նշված են *