Պաշտպանության նախարար Սեյրան Օհանյանն Արցախում հանդիպել է Բակո Սահակյանի հետ. քննարկվել են տարածաշրջանային անվտանգության հարցեր: Այսօր կայացած ասուլիսում բանավեճ-երկխոսություն է ծավալվել Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցի և «Խաչակիր» ՀԿ-ի խորհրդի նախագահ Գագիկ Սարուխանյանի միջև:
Ադրբեջանը շարունակում է մարդասպան Ռամիլ Սաֆարովին վերադարձնելու փորձեր ձեռնարկել: ԱՄՆ-ն պատժամիջոցներ է սահմանել Իրանի ԶՈւ գլխավոր շտաբի հրամանատարի նկատմամբ: Թուրքիան Իրանից սպառնալիքների համար պատասխան է պահանջել:
- Սեյրան Օհանյանն ու Բակո Սահակյանը քննարկել են պաշտպանական խնդիրները և կարևորել համագործակցությունը՝ տարածաշրջանում կայունության պահպանման համար: Թեման նաև՝ panarmenian.net-ում:
- Ազատամարտիկների հետ հանդիպելիս Բակո Սահակյանը նշել է, որ նրանց խնդիրները նաև իշխանության խնդիրներն են և կանեն ամեն ինչ՝ դրանք ժամանակին ու պատշաճ կերպով լուծելու համար:
Մեջբերեմ մի քանի հատված՝ այսօր կայացած Սաքունց-Սարուխանյան ասուլիսային հանդիպումից:
- «Զորակոչի կարգավորումը չի կարող որակական փոփոխությունների հանգեցնել, եթե ծառայության հոգեբանությունը չփոխվի: Ես ինքս որդի ունեմ եւ կցանկանայի, որ նա մեզ համար ցանկալի բանակում ծառայեր»,- նշել է Սաքունցը:
- Այն որ եկող սերունդները պետք է ծառայեն ավելի կայացած բանակում՝ համաձայնել է նաև Սարուխանյանը և հավելել. «Բանակը միայն հայելին է ընդհանուր հասարակութան, իսկ հասարկությունը փտած է: Պետք է սկսել դպրոցներից, զբաղվել երեխաների, ապագա զինվորների մոտ հայրենասիրական ոգու մշակմամբ»:
- «Բազմիցս նշել եմ, որ համակարգային փոփոխություններ են պետք, համակարգն է փտած, որ միջադեպերը կնվազեն, եթե վերանա կոռուպցիան, ահազանգերի դեպքում պատշաճ քննություն անցկացվի, մահվան ելքով միջադեպերի դեպքում կատարվի պատշաճ նախաքննություն և պատժվեն իրական մեղավորները»,- հարցազրույցում հավաստիացրել է Սաքունցը, իսկ Սարուխանյանը Սաքունցին խորհուրդ է տվել չկոտրել բանակի ոգին:
Ադրբեջանի գերագույն դատարանի նախագահ Ռամիզ Ռզաեւը հայտարարել է, որ հայ սպա Գուրգեն Մարգարյանին Հունգարիայում կացնահարած Ռամիլ Սաֆարովի էքստադիցիայի հարցը Ադրբեջանի եւ Հունգարիայի երկկողմ որոշելիք խնդիրն է, սակայն Հունգարիան դեռևս հրաժարվում է մարդասպանին հանձնել Ադրբեջանին: Թեման նաև news.am և haynews.am լրատվական կայքերում:
Միջազգային լուրերից.
- ԱՄՆ-ն պատժամիջոցներ է սահմանել իրանցի երկու հրամանատարի նկատմամբ՝ սառեցնելով բոլոր հաշիվները, որոնք հրամանատարները կարող են ունենալ ԱՄՆ-ում: Պատժամիջոցների առիթ է հանդիսացել Թեհրանի նախագահական ընտրություններից հետո հակակառավարական ցույցերի ճնշումը, որի ժամանակ մարդիկ են սպանվել:
- Թուրքական լրատվամիջոցների փոխանցմամբ՝ Թուրքիայի արտգործնախարար Ահմետ Դավութօղլուն զանգահարել է իր իրանցի պաշտոնակից Ալի Աքբար Սալեհիին` պահանջելով պարզաբանել Իրանի խորհրդարանի արտաքին քաղաքականության և ազգային անվտանգության հարցերի հանձնաժողովի փոխնախագահ Հուսեյն Իբրահիմի հայտարարությունը, թե Իրանը ցանկացած գրոհի դեպքում հարված կհասցնի ՆԱՏՕ-ի` Թուրքիայում տեղակայված ՀՀՊ-ին: Ըստ նույն աղբյուրի՝ Սալեհին նշել է, թե դա անձնական կարծիք է եղել և չի արտացոլում կառավարության դիրքորոշումը: