ՌԴ-ն ու Թուրքիան միայն Սու-57-ի վաճառքի շուրջ երբեք չեն բանակցել. «Ռոստեխ»

Ռուսաստանը պատրաստ է Թուրքիային վաճառել չորրորդ սերնդի Սու-35 կործանիչներ այն պայմանով, որ Թուրքիան գնի հինգերորդ սերնդի Սու-57-երը։ Մինչ այսօր կողմերը երբևէ չեն բանակցել բացառապես Սու-57-ի վաճառքի համար։

Այս մասին այսօր Դուբայում ավիացուցահանդեսի ընթացքում Defense News-ին հայտնել է ռուսական պետական ռազմարդյունաբերական «Ռոստեխ» ընկերության միջազգային համագործակցության գծով տնօրեն Վիկտոր Կլադովը, փոխանցում է ռուսական պետական «ՏԱՍՍ» գործակալությունը։

« ․․․ Նրանք [Թուրքիան — Ռազմինֆո խմբ.] ուզում են զարգացնել իրենց ինքնաթիռները, և մենք հիմա ունենք նախնական բանակցություններ ուղղված Սու-35-երին, այն պայմանով, որ Թուրքիան պլանավորի գնել Սու-57 ․․․ »,– ասել է Կլադովը։

Կլադովը, պատասխանելով հարցին՝ արդյոք հնարավոր է, որ թուրքական արտադրության առաջին կործանիչի՝ TF-X-ի համար լինի համատեղ արտադրություն, ասել է, որ Մոսկվան կա՛մ կարող է օգնել շարժիչի հարցում կա՛մ դառնա լիարժեք գործընկեր։

Հիշեցնենք, որ Թուրքիան Ռուսաստանից 2017թ․ գնեց Ս-400 ՀՕՊ համակարգեր, որոնց մատակարարումները սկսեց 2019թ․ հուլիսի 12-ին։ Այս գործարքին դեմ ԱՄՆ-ն մատակարարումներից հինգ օր հետո՝ հուլիսի 17-ին, հայտարարեց, որ Թուրքիայի անդամակցությունը F-35-երի ծրագրին մինչև 2020թ․ մարտ սառեցվում է, իսկ թուրք օդաչուները, կիսատ թողնելով դասընթացները, վերադարձան Թուրքիա։

2019թ․ նոյեմբերի 13-ին Վաշինգթոնում հանդիպման ընթացքում ԱՄՆ նախագահ Դոնալդ Թրամփը և Թուրքիայի նախագահ Ռեջեփ Թայիփ Էրդողանը կրկին քննարկեցին այս հարցը, այնուհետև հայտարարեցին, որ երկկողմ բանակցությունները շարունակվելու են, մինչև «Ս-400-ների խնդրի լուծումը»։

Մինչ հարցը «կլուծվի», թուրքական ու ռուսական մեդիայում ակտիվ քննարկվում է այն հարցը, որ Թուրքիան F-35 կործանիչի փոխարեն կարող է գնել ռուսական Սու-57-ը։ Ավելին՝ 2019թ․ օգոստոսի 27-ին պաշտոնական այցով Ռուսաստան մեկնած Էրդողանը ավիացիոն ցուցահանդեսից առաջ ՌԴ նախագահ Պուտինին հարցրեց․ «Սա Սու-57 է՞ ․․․ մենք սրանի՞ց ենք գնելու»։

Թուրքիայի նախագահ Էրդողանը Ռուսաստանում

Հավանական է, որ Սու-57-ի մասին քննարկումներն առայժմ նախազգուշացումներ են ամերիկյան կողմին այն մասին, որ եթե F-35-երը չլինեն Թուրքիան ուրիշ այլընտրանքներ կգտնի, սակայն չի կարելի նաև բացառել հնարավոր գնումը, քանի որ ռուսական արտադրության ՀՕՊ համակարգերն, այնուամենայնիվ, այժմ ՆԱՏՕ անդամ Թուրքիայի տարածքում են։

Մեկնաբանել

Ձեր էլ. փոստի հասցեն չի հրատարակվելու: Պարտադիր դաշտերը նշված են *