«Ռոսoբորոնէքսպորտ» ընկերության գլխավոր տնօրենի տեղակալ Ալեքսանդր Մեխտիևը լրագրողներին տեղեկացրել է, որ Ռուսաստանն ու Սերբիան դադարեցրել են բանակցությունները՝ բալկանյան երկրին բազմաֆունկցիոնալ Սու-30 կործանիչի տրամադրման վերաբերյալ։
Պարզվում է՝ բանակցություններն ընթացքի մեջ էին, երբ Սերբիան հայտնեց իր ֆինանսական դժվարությունների մասին։
Ընդ որում, ներկայումս բելառուսյան Բարանովիչներում տեղակայված է 18 միավոր Սու-30Կ կործանիչների խմբաքանակ, որը Հնդկաստանը վերադարձրել է «trade-in» համակարգով՝ փոխարինելով ավելի կատարելագործված Սու-30ՄԿԻ ինքնաթիռներով։ Մեխտիևի խոսքերով՝ ներկա դրությամբ բանակցություններ են ընթանում կործանիչների արդիականացման ու Եթովպիային տրամադրելու ուղղությամբ։
Սու-30ՄԿ
Նշենք, որ Մեխտիևը չի հայտնել բանակցությունների մանրամասները, չի մեկնաբանել նաև՝ արդյոք դրանք Սերբիային առաջարկած ինքնաթիռներն էին, թե ոչ։
Հավելենք, որ 2009-ի սկզբին Սերբիայի ՊՆ-ն մտադիր էր ձեռք բերել մի քանի կործանիչներ, որոնք ունակ են ցամաքային թիրախ ոչնչացնել և հետախուզման նպատակով օգտագործել։ Որպես հնարավոր տարբերակներ դիտարկվում էին ամերիկյան F-16 Fighting Falcon ու F/A-18 Super Hornet-ը, եվրոպական Eurofighter Typhoon-ը, շվեդական JAS 39 Gripen-ն ու ռուսական ՄիԳ-29 и Սու-30։
Ընթացիկ տարվա ապրիլին հայտնի դարձավ, որ Սերբիան ցանկանում է ՌԴ-ից գնել 6 միավոր ՄիԳ-29Մ/Մ2 կործանիչներ։ Պայմանագիրը նախատեսվում էր ստորագրել 2013-ի վերջին։
Ավելի ուշ հաղորդվում էր, որ Ռուսաստանը Սերբիային կտրամադրի արտահանման վարկ՝ սպառազեն ու զինտեխնիկա գնելու համար, այդ թվում՝ Միգ-29 ու վերգետնյա ռադիոտեղորոշման կայաններ։ Այս հնարավոր գործարքի մանրամասները ևս հայտնի չեն։