Կիրակի՝ հուլիսի 7-ին, ռուսական երկու բեռնատար ինքնաթիռ կբեռնվի Ս–400 ՀՕՊ համակարգերի պահեստամասերով։ Դրանք արդեն եկող շաբաթ կլինեն Թուրքիայում։
Այս մասին հայտնում է թուրքական իշխանամետ Habertürk լրատվական գործակալությունը։
Ըստ աղբյուրի՝ առաջին փուլում Թուրքիա է մատակարարվելու Ս–400-ների մեկ մարտկոց, մատակարարումը լինելու է մաս-մաս։
Նշվում է, որ Ս–400-ների տեղակայման համար ավելի վաղ Թուրքիա է ժամանել հատուկ տեխնիկական մասնագետների խումբ։ Բացի 9 անդամից բաղկացած խմբից, որը մեկնել է Ռուսաստանից, մինչև երկուշաբթի Թուրքիա կգնա նաև տեղակայման աշխատանքներ կատարող խումբը։
Նշենք, որ ըստ թուրքական իշխանամետ «Թուրքիա» թերթի՝ Թուրքիան կստանա 36 արձակման կայան, որոնք բաժանված կլինեն 4 դիվիզիոնի։ Ըստ թերթի՝ կմատակարարվի 192 հրթիռ. յուրաքանչուր դիվիզիոն ներառում է 9 արձակման կայան, որից ամեն մեկը՝ 4 հրթիռ։ Այսինքն՝ 36 արձակման կայանը միասին ունենալու են 144 հրթիռ, իսկ մնացած 48 հրթիռը լինելու է պահեստային։
Թուրքական աղբյուրներում տարածված է այն տեսակետը, որ ռուսական ՀՕՊ համակարգերը պաշտպանելու են մայրաքաղաք Անկարայի և Ստամբուլի օդային տարածքը։
Ս–400-ների գնման պայմանագիրը Թուրքիայի և Ռուսաստանի միջև կնքվել է 2017թ. դեկտեմբերին։
Ս-400 «Տրիումֆ» ՀՕՊ համակարգերի մարտավարատեխնիկական բնութագիրը․
- Թիրախի հայտնաբերման հեռահարությունը՝ 600 կմ;
- Միաժամանակ խոցվող թիրախների առավելագույն քանակը՝ 10 (յուրաքանչյուրը);
- Հնարավոր թիրախները՝ ինքնաթիռներ, բալիստիկ հրթիռներ;
- Աերոդինամիկ թիրախները (ինքնաթիռներ, ուղղաթիռներ և այլ օդային միջոցներ) կարող է խոցել մինչև 400 կմ հեռավորության վրա;
- Բալիստիկ թիրախները՝ 60 կմ հեռավորության վրա։