Թուրքական կործանիչի նախատիպն առաջին անգամ ցուցադրվել է Փարիզում

Հունիսի 17–23-ը Ֆրանսիայի մայրաքաղաք Փարիզում անցկացվում է «Paris Air show–2019» ավիաշոուն, որին մասնակցում է նաև թուրքական պատվիրակությունը՝ «Թուրքիայի ավիաշինական արդյունաբերություն» ընկերությունից։

Ընկերությունն այսօր առաջին անգամ Փարիզում ցուցադրել է իր TF-X 5-րդ սերնդի կործանիչի նախատիպը։ Կործանիչի առաջին թռիչքն, ըստ TAI ընկերության տնօրեն Թեմել Քոթիլի՝ նախատեսվում է 2025թ.։

Թուրքական TF-X կործանիչն առաջին անգամ ցուցադրվել է Փարիզում
Թուրքական TF-X կործանիչն առաջին անգամ ցուցադրվել է Փարիզում

Թուրքական CNN հեռուստաընկերության հրապարակած կադրերում երևում է, որ թուրքական պատվիրակությունը Փարիզում ներկայացրել է նաև «Հյուրջեթ» կործանիչը, «Գյոքբեյ» ուղղաթիռը և «Անքա» ԱԹՍ–ները: 

TF-X ինքնաթիռի կառուցման մասին Թուրքիան առաջին անգամ հայտարարել է 2011 թվականին։ Կործանիչի ստեղծման ուղղությամբ համատեղ աշխատում են բրիտանական BAE-ն ու «Թուրքական ավիաշինական արդյունաբերություն» ընկերությունը (TAI

2013-ին Թուրքիան կործանիչի ստեղծման համար համաձայնագիր էր կնքել շվեդական «Սաաբ» (Saab) ընկերության հետ: Այս գործարքը չստացվեց, ինչից հետո թուրքական կողմը համագործակցության գնաց բրիտանական BAE ընկերության հետ:  

Կործանիչի շարժիչի արտադրման համար բրիտանական Rolls-Royce ընկերությունը 2017թ. մայիսի 8-ին պայմանագիր էր կնքել թուրքական Kale ընկերության հետ, սակայն 2019թ. մարտին բրիտանական ընկերությունը հայտարարեց, որ հրաժարվում է գործարքից։

Դրան զուգահեռ Թուրքիայի պաշտպանական արդյունաբերության գլխավոր վարչությունը (ՊԱԳՎ) 2018թ. նոյեմբերին շարժիչների տեղական արտադրության համար պայմանագիր կնքեց թուրքական TR-Motor ընկերության հետ։

TF-X կործանիչի մարտավարատեխնիկական բնութագիրը, ըստ TAI ընկերության պաշտոնական կայքի՝

  • Առավելագույն բարձրությունը՝ ~16,8 կմ
  • Առավելագույն արագությունը՝ 2 մախ (~2470 կմ/ժ)
  • Գործողության շառավիղը՝ ~1000 կմ 
  • Առավելագույն թռիչքային զանգվածը՝ ~27200 կգ
  • Երկարությունը՝ 19 մ
  • Թևերի բացվածքը՝ 12 մ

Մեկնաբանել

Ձեր էլ. փոստի հասցեն չի հրատարակվելու: Պարտադիր դաշտերը նշված են *