Ավարտվել է Ադրբեջան–Վրաստան–Թուրքիա ՊՆ–ների հանդիպումը

Հունիսի 12–ին Ադրբեջանի Գաբալա քաղաքում անցկացվեց Ադրբեջանի, Վրաստանի, Թուրքիայի պաշտպանության նախարարների 7-րդ համատեղ հանդիպումը։ Ըստ պաշտոնական հայտարարությունների՝ կողմերը քննարկել են եռակողմ ռազմական, ռազմատեխնիկական և ռազմակրթական ոլորտներում համագործակցության ընդլայնումը և տարածաշրջանային անվտանգությունը։

Հանդիպման ավարտին քննարկումների արդյունքների հիման վրա կողմերը համագործակցության արձանագրություն են ստորագրել, դրանից հետո՝ տվել համատեղ մամուլի ասուլիս։

Թուրքիայի, Ադրբեջանի և Վրաստանի պաշտպանության նախարարների 7-րդ համատեղ հանդիպումը
Թուրքիայի, Ադրբեջանի և Վրաստանի պաշտպանության նախարարների 7-րդ համատեղ հանդիպումը

Հայտարարություններ․

Ադրբեջանի ՊՆ Զաքիր Հասանովը հայտարարել է, որ «այս տարի Թուրքիան ու Ադրբեջանը անցկացնելու են համատեղ 13 զորավարժություն՝ ի համեմատ 2018թ. 7 զորավարժության»։ Ըստ նրա՝ հանդիպմանը կողմերը զորավարժությանը մասնակցելու են հրավիրել Վրաստանին։

Վրացի նախարար Լևան Իզորիան ընգծել է, որ կողմերը պատրաստակամություն են հայտնել մասնակցելու Վրաստանում անցկացվելիք ՆԱՏՕ-ի շրջանակներում անցկացվող կամ միջազգային այլ զորավարժություններին։

Վրաստանի պատվիրակությունն Ադրբեջանում՝ պաշտպանության նախարար Լևան Իզորիայի գլխավորությամբ
Վրաստանի պատվիրակությունն Ադրբեջանում՝ պաշտպանության նախարար Լևան Իզորիայի գլխավորությամբ

Կողմերը հայտարարել են, որ համագործակցության շրջանակներում աջակցելու են Թուրքիային՝ «ահաբեկիչների դեմ պայքարում»։

Երկկողմ հանդիպումներ․

Մինչ համատեղ հանդիպումը երեք նախարարները տարբեր երկկողմ հանդիպումներ են ունեցել։

Զաքիր Հասանովը վրացի գործընկերոջ հետ հանդիպման ընթացքում ստորագրել է երկու երկրների ռազմական համագործակցության 2019թ. ծրագիրը, իսկ թուրք գործընկերոջ՝ Հուլուսի Աքարի հետ, ում հանդիպել էր նաև հունիսի 10–ին՝ Նախիջևանում, Հասանովը քննարկել է երկկողմ համագործակցությունը։

Թուրքիայի և Ադրբեջանի պաշտպանության նախարարներ Հուլուսի Աքարի և Զաքիր Հասանովի երկկողմ հանդիպումը
Թուրքիայի և Ադրբեջանի պաշտպանության նախարարներ Հուլուսի Աքարի և Զաքիր Հասանովի երկկողմ հանդիպումը

Առանձին հանդիպել են նաև Լևան Իզորիան և Հուլուսի Աքարը։ Ըստ Վրաստանի ՊՆ–ի՝ քննարկվել են ռազմական ոլորտում համագործակցությունը, ՆԱՏՕ–Վրաստան զորավարժությունները և Սև ծովում անվտանգության պահպանմանն ուղղված հարցեր։

Հանդիպմանը մասնակցելու համար Վրաստանի նախարարը Ադրբեջան էր ժամանել երեկ՝ հունիսի 11–ին, իսկ Թուրքիայինը՝ հունիսի 10–ից Նխաիջևանում էր և հետևում էր թուրք–ադրբեջանական համատեղ զորավարոժությանը։

Նշենք, որ այս տարի ապրիլին իր հարցազրույցում Ադրբեջանի պաշտպանության նախարար Զաքիր Հասանովը հատուկ ընգծել էր Թուրքիայի հետ երկկողմ և եռակողմ զորավարժությունները անցկացնելու մասին ծրագրերը։ Հասանովը Վրաստանի և Թուրքիայի հետ համատեղ եռակողմ զորավարժությունները պայմանավորում է տնտեսական ծրագրերի անվտանգության ապահովման անհրաժեշտությամբ:

Երեք երկրների պաշտպանության նախարարների մակարդակով հանդիպումները սկսել են 2012թ–ից և անկացվում են տարին մեկ անգամ։

Մեկնաբանել

Ձեր էլ. փոստի հասցեն չի հրատարակվելու: Պարտադիր դաշտերը նշված են *