Թուրքիայում Ադրբեջանի ու Վրաստանի մասնակցությամբ զորավարժություն է եղել

Մայիսի 6-23-ը Թուրքիայի Կայսերի քաղաքում Ադրբեջանի, Վրաստանի, Իտալիայի, ԱՄՆ–ի, Ռումինիայի, Պակիստանի և Կատարի զինված ուժերի մասնակցությամբ անցկացվել է «Էրջիյես-2019» միջազգային զորավարժությունը։

Այս մասին հայտնում է թուրքական NTV հեռուստաալիքը։ Նշվում է, որ թուրքական կողմից զորավարժությանը մասնակցել է ցամաքային ուժերի հրամանատարության առաջին բրիգադը։ Իրականացվել են օդից անձնակազմի վայրէջքի վարժանքներ։

Թուրքական T129 Atak հարվածային ուղղաթիռները «Էրջիյես-2019» միջազգային զորավարժությանը
Թուրքական T129 Atak հարվածային ուղղաթիռները «Էրջիյես-2019» միջազգային զորավարժությանը

Ըստ աղբյուրի՝ զորավարժությանը ներգրավվել է 895 զինծառայող և 67 միավոր զինտեխնիկա։ Վարժանքներին ներգրավվել է նաև 17 միավոր օդուժ միջոց, որից 7-ը մարդատար ինքնաթիռ, 2 հարվածային ուղղաթիռ, 2 բեռնատար ուղղաթիռ և 6 բազմանպատակային ուղղաթիռ։

Նշվում է նաև, որ զորավարժության ընթացքում զորքերը գրավել են պայմանական հակառակորդի («ահաբեկիչների») վերահսկողության տակ գտնվող տարածքը, որից հետո ժամանել են Արտակարգ իրավիճակների նախագահության և Կարմիր խաչի հումանիտար օգնության ուժերը։

Հիշեցնենք, որ մայիսի 13-23-ն էլ Թուրքիայի Քոնյա քաղաքում Ադրբեջանի և Սաուդյան Արաբիայի մասնակցությամբ անցկացվեց նաև “Anatolian Phoenix-2019” զորավարժությունը։ Ադրբեջանից զորավարժությանը մասնակցել էին երկուական միավոր Մի-35 և Մի-17 ուղղաթիռ և 60 զինծառայող։ Ադրբեջանական կողմը զորավարժությունից կադրեր էր հրապարակել, ինչից դատելով՝ ենթադրել էինք, որ վարժանքներին մասնակցել էր նաև Ադրբեջանի ԶՈւ հատուկջոկատային ստորաբաժանում։

Մեկնաբանել

Ձեր էլ. փոստի հասցեն չի հրատարակվելու: Պարտադիր դաշտերը նշված են *