Հայաստանի պաշտպանության նախարարությունը հավելավճարների հաշվին բարձրացնում է զինծառայողների աշխատավարձը։ Սրա համար հաստատված պաշտպանական բյուջեի ներքին վերաբաշխումների արդյունքում 6 ամսվա համար կառանձնացվի 1 մլն 336 հազար ՀՀ դրամ:
Որոշման նախագծի մեջ նշվում է, որ առաջարկվում է ծառայության առանձնահատկություններով պայմանավորված հավելումները (գործակիցները) համապատասխանեցնել ծառայողական խնդրի կարևորությանն ու ծանրաբեռնվածությանը։
«Ներկայացված միջոցառումների իրականացումն անհրաժեշտ է մարտական հերթապահություն և առօրյա գործունեության այլ առանձնահատուկ պայմաններում ծառայություն իրականացնող զինծառայողներին խրախուսելու, զինծառայության գրավչությունը, նրանց մարտական ոգին և ԶՈՒ կարողությունները բարձրացնելու համար»:
Նախարարը կառավարության նիստին ասել է, որ կրտսեր կազմի զինծառայողների աշխատավարձերը բարձրանալու են միջինը 18 տոկոսով, իսկ հատուկ պայմաններում ծառայողները կստանան հավելավճարներ, որոնղ հաշվին կմեծացնեն աշխատավարձերը։
«Հարգելի՛ գործընկերներ, բարձրագույն սպայական կազմի և կրտսեր ենթասպայական կազմի հավելումների համահավասարեցում է իրականացվում։ Մոտավորապես համահավասար հավելում են ստանալու և՛ զինված ուժերի գլխավոր շտաբի պետը, և՛ պայմանագրային շարքայինը»,- մասնավորապես ասել է Տոնոյանը։