Փետրվարի 22–ին Սիրիայի Դեր–Զոր նահանգում Ռուսաստանի զինված ուժերի սպաներին տեղափոխող «ՈւԱԶը» ընկել էր դարանակալման մեջ, ինչի հետևանքով սպաները անհայտ կորած էին համարվում։ Այսօր՝ մարտի 26–ին, Ռուսաստանի ՊՆ–ն հաստատել է սպաների մահվան մասին լուրը։
Այս մասին հայտնում է ՌԴ ՊՆ «Զվեզդա» հեռուստաալիքը։
Հաղորդագրության մեջ նշվում է, սպաները վերադառնում էին հումանիտար օգնություն փոխանցելու առաքելությունից։ Պաշտպանության նախարարության փոխանցմամբ՝ դարանակալումը կազմակերպած շուրջ 30 զինյալը հայնաբերվել և ոչնչացվել են։
Նախքան Ռուսաստանի ՊՆ-ի հայտարարությունը, դեպքի մասին հայտնել է BBC-ի ռուսաստանյան ծառայությունը, ինչպես նաև Ուկրաինայի «Գերագույն ռադայի» պատգամավոր Դմիտրի Տիմչուկը: Ըստ նրանց՝ զոհվածների թվում էին մայոր Սուխրոբ Կարիմովը և 3–րդ հատուկ նշանակության առանձին բրիգադի հրամանատար գնդապետ Օմարովը:
2019 թվականի ընթացքում սա երկրորդ դեպքն է, երբ ՌԴ ՊՆ–ն հայտնում է զինծառայողների մահվան մասին։ Առաջին դեպքում կառույցը հայտնել էր հունվարի 31–ին Սիրիայում զոհված Մաքսիմ Պլանտևի մասին։
Հիշեցնենք, որ 2015 թվականին Ռուսաստանը ընդունել է օրենք, որով խաղաղ ժամանակ հատուկ գործողությունների ընթացքում զոհվածների մասին տեղեկատվությունը համարվում է պետական գաղտնիք։