Ռուսաստանի օդային տրանսպորտի դաշնային գործակալության («Ռուսավիացիա») և Թուրքիայի քաղավիացիայի գլխավոր տնօրինության հետ կնքած պայմանագրի շրջանակներում Թուրքիային մատակարարվել է նախատեսված 3 միավոր Կա-32 բազմանպատակային ուղղաթիռներից առաջինը։
Այս մասին IDEX-2019 ռազմատեխնիկական ցուցահանդեսի ընթացքում «ՌԻԱ Նովոստի» ռուսական պետական գործակալությանը հայտնել է «Ռուսաստանի ուղղաթիռներ» հոլդինգի տնօրեն Անդրեյ Բոգինսկին։
Նա նշել է, որ այս տարվա մարտի վերջին կսկսեն քննարկումներ համագործակցությունը ընդլայնելու շուրջ, քանի որ Թուրքիան դեռ հնարավորություն ունի գնելու ևս 5 միավոր Կա-32 ուղղաթիռ։
Բոգինսկին հավելել է, որ թուրքական կողմը հետաքրքրված է նաև ռուսական արտադրության «Անսատ» բազմանպատակային ուղղաթիռներով, սակայն այլ մանրամասներ չի հայտնել։
Հիշեցնենք, որ 2017թ. օգոստոսին Ռուսաստանը Թուրքիայի ու Թաիլանդի հետ կնքել էր 8 միավոր Կա-32 ուղղաթիռների արտահանման պայմանագիր, որից Թուրքիայի համար նախատեսված էր 3 միավորը։ Ուղղաթիռները 2018թ. գարնանից Թուրքիա մատակարարելու համար երկու կողմերը պայմանագիր էին կնքել 2018թ. փետրվարի 7-ին, սակայն մատակարարումն ամենայն հավանականությամբ հետաձգվել է։
Կա-32Ա11ՎՍ ուղղաթիռները նախատեսված են որոնողափրկարարական, հիվանդների, վիրավորների տարհանման, հրդեհամարման աշխատանքների կատարման, ինչպես նաև պարեկության համար։
Համաձայն ռուսաստանյան կողմի տրամադրած տվյալների՝ ուղղաթիռը կարող է վայրէջք կատարել փոքր նավերի տախտակամածերին, հորատման պլատֆորմերին, դժվարահասանելի կետերում։ Կառավարում է մեկ օդաչու, բեռանատարողությունը՝ 5 տոննա։
Հավելենք, որ Բոգինսկու նշած «Անսատ» ուղղաթիռները ևս նախատեսված են որոնողափրկարարական, հրդեհամարման աշխատանքների, բեռնափոխադրման համար։ Ըստ գործակալության պաշտոնական կայքի՝ այն կարող է տեղափոխել մինչև 8 անձ։
