Հունվարի 23–ի գիշերը հայտնի է դարձել, որ Սիրիայում ահաբեկչական կազմակերպություն համարվող «Ալ Քաիդա»–ի ճյուղերից՝ «Հայաթ Թահրիր ալ–Շամ» խմբավորումը հարձակվել է Իդլիբի նահանգի Աբու–Դուհուր և Աբու–Շարջա քաղաքներում տեղակայված Սիրիայի կառավարական զորքերի վրա։
Այս մասին հայտնում է (1) ռուսական պետական «ՌԻԱ Նովոստի»* գործակալությունը՝ հղում անելով «Սիրիայում պատերազմող կողմերի հաշտեցման ռուսական կենտրոնի» ղեկավար, գեներալ–լեյտենանտ Սերգեյ Սոլոմատինին։
*«ՌԻԱ Նովոստին» գրում է, որ հարձակվել են «Ալ–Նուսրա» խմբավորման անդամները, սակայն հարկ է նշել, որ 2017թ. փետրվարին «Ալ–Նուսրա» խմբավորումը լուծարվել է և դրա անդամները ստեղծել են «Հայաթ Թահրիր ալ–Շամը»։
Սոլոմատինը հայտնել է, որ խմբավորման անդամներին հաջողվել է Աբու–Դուհուր քաղաքում մինչև 1,5 կմ խորանալ Սիրիայի կառավարական զորքերի մեջ, սակայն հետո նրանց առաջխաղացումը կանխվել է սիրիական ուժերի կողմից։
Խմբավորման անդամների առաջխաղացումը կանխվել է նաև Աբու–Շարջա քաղաքում, որտեղ, ըստ Սոլոմատինի, խմբավորումը կորուստներ է կրել։
Նշենք, որ Ռուսաստանի արտգործնախարար Սերգեյ Լավրովը հունվարի 18–ին հայտարարել է, որ իսլամիստական խմբավորումը իր վերահսկողության տակ է վերցրել Իդլիբի ապառազմականացված գոտու 70 տոկոսը, չնայած Թուրքիա–Ռուսաստան համաձայնագրի։
Վերոնշյալ համաձայնագիրը Թուրքիայի և Ռուսաստանի միջև կնքվել էր 2018թ. սեպտեմբերի 17–ին՝ Սոչիում։ Ըստ դրա՝ մինչև հոկտեմբերի 15–ը Սիրիայից դուրս բերվեց ընդդիմադիր ուժերի ամբողջ սպառազինությունը, Իդլիբի շուրջ ստեղծվեց ապառազմականացված գոտի ու այդտեղ թուրքական և ռուսական զինված ուժերը սկսեցին կատարել անկախ պարեկային գործողություններ։