Առաջնագծի արդիական տեխնիկական միջոցներով համալրելու և մարտական խնդիրների կատարման արդյունավետությունը բարձրացնելու առումով 2016թ. երկրորդ կեսին և 2017թ. ընթացքում կատարված աշխատանքների շնորհիվ մեծապես փոխվել է առաջնագիծը։
Այս մասին հայտնել է Դավիթ Տոնոյանը։
«․․․մեծապես փոխվել է առաջնագծի զինվածությունը տեսադիտարկման և հավաստանշման սարքավորումներով, որոնք թույլ են տվել զգալիորեն նվազեցնել անակնկալ դիվերսիաներ իրականացնելու հակառակորդի հնարավորությունները: Ընթացքի մեջ են առաջնագծում հակառակորդի հայտնաբերման, որոշումների կայացման, կրակային և ինժեներական միջոցներով հակառակորդի խոցման ու հասցված վնասների գնահատման ինտեգրված համակարգի ստեղծման ուղղությամբ ձեռնարկվող միջոցառումները»,–նշվում է ՊՆ հաղորդագրութան մեջ։
Նշենք, որ 2016-ի ապրիլից հետո մեծ թափ են առել առաջնագծի կահավորման նախկինում սկսած աշխատանքները։ Առաջնագիծն այս պահին շարունակում է համալրվել գիշերային տեսանելիության և տեսադիտարկման սարքերով։ Համալրմանը մասնակցում են նաև անհատ բարերարներ, ձեռներեցներ։