«Հյուրիեթ» լրատվակայքը հայտնում է, որ Պենտագոնը Թուրքիային հանձնել է առաջին միավոր F-35 կործանիչը, թեև Միացյալ Նահանգների Սենատը քննարկում է Թուրքիային կործանիչների վաճառքը արգելափակելու հարցը: Նշենք, որ այս կործանիչը շուրջ երկու տարի մնալու է ԱՄՆ-ում՝ թուրք օդաչուներին մարզելու համար:
Նշենք, որ մայիսի 25-ին ԱՄՆ ներկայացուցիչների պալատն ընդունել էր օրինագիծը, որով պաշտպանության դեպարտամենտին արգելվում է Թուրքիային վաճառել ծանր սպառազինություն, այդ թվում՝ F-35 կործանիչներ, մինչև Պենտագոնը չներկայացնի Թուրքիայի կողմից S-400-ների գնման, ԱՄՆ-Թուրքիա հարաբերությունների վերաբերյալ զեկույց-գնահատական:
Զեկույցը պետք է ներկայացվեր օրինագծի ընդունումից հետո առավելագույնը 60 օր ժամկետում: Մինչև տվյալ զեկույցի ներկայացումը և քննարկումը Պենտագոնին արգելվում էր Թուրքիային վաճառել կործանիչներ:
Այս օրինագծի ընդունումից երկու օր առաջ՝ մայիսի 23-ին, օդում փորձարկվել էր Թուրքիայի համար նախատեսված F-35 կործանիչը: Թուրքիական լրատվակայքերն էլ հայտնում էին, որ մինչև հունիսի 21-ը կներկայացվի առաջին նմուշը:
Türkiye için üretilen ilk F-35A uçağının Lockheed Martin Texas Fort Worth tesislerinden havalanışı. pic.twitter.com/IetzTZJa6g
— SSM (@SavunmaSanayii) May 23, 2018
Ըստ նախնական տվյալների՝ Թուրքիան նշված ռազմական ինքնաթիռները (100 միավոր) պետք է ստանար 2019 թվականից սկսած:
Նշենք, որ Թուրքիան մասնակցում է նաև F-35A կործանիչների արտադրությանը: 2014-ի հունիսին Թուրքիայի Իզմիր (Զմյուռնիա) նահանգում բացվել է ամերիկյան Pratt & Whitney և թուրքական Kale ընկերությունների համատեղ գործարանը, որը նախատեսված է հինգերորդ սերնդի F-35 կործանիչի համար F135 շարժիչի մասերի արտադրության համար:
F-35-ը նախագծվել է ամերիկյան Lockheed Martin ընկերության կողմից: Բացի բազային՝ F-35A տարբերակից, ԱՄՆ ծովային հետևակի համար նախագծվել է նաև F-35B տարբերակը՝ ուղղահայաց վայրէջքի և կարճ տարածությունից մեկնարկային թռիչքի հնարավորությամբ, իսկ ԱՄՆ ՌԾՈւ-ի համար նախագծվել է F-35C տարբերակը, որը նախատեսված է ավիակրից թռիչքների համար:
Կործանիչն առաջին թռիչքը կատարել է 2006-ին։ Առավելագույն արագությունը 1930 կմ/ժ է, թռիչքի հեռավորությունը՝ 2200 կմ։ Զինված է 25 մմ ավտոմատ թնդանոթով, ունի սպառազինության 6 արտաքին և 2 ներքին կախոց։ Կարող է կրել «օդ-օդ», «օդ-մակերևույթ» և հականավային հրթիռներ, տարատեսակ ռումբեր։