ՄԱԿ-ի՝ խաղաղապահ առաքելության վարչությունը պաշտոնապես խնդրել է Ավստրիային ավարտել Գոլանի բարձունքներից իր խաղաղապահների դուրս բերման գործընթացը ոչ վաղ, քան հուլիսի վերջին։
Ռոյթերս գործակալություն հայտնում է, որ ներկայումս ՄԱԿ-ը բանակցություններ է վարում այլ երկրների հետ՝ ավստրիական կորպուսը փոխարինելու նպատակով, սակայն խաղաղապահների նոր ջոկատների հավաքագրման և տեղաբաշխման համար կպահանջվի առնվազմ 6-8 շաբաթ։ Համաձայն ռուսական աղբյուրների՝ հավանական է, որ ավստրիացիներին փոխարինեն Շվեդիայի խաղաղապահները։
Ավստրիայի խաղաղապահներ
Կազմակերպության ղեկավարները շեշտել են՝ «Գոլանում խաղաղապահական առաքելությունը չափազանց կարևոր է, և ՄԱԿ-ը կանի ամեն հնարավորը՝ դրա կենսունակությունը պահպանելու ուղղությամբ»։
Նշենք, որ Ավստրիայի իշխանությունների արձագանքի մասին դեռևս տեղեկություններ չկան։
Հիշեցնենք, որ հունիսի 12-ին, պատճառաբանելով, որ ռազմական գործողություններն արդեն ծավալվում են Գոլանի բարձունքների տարածքում, ավստրիացի խաղաղապահները սկսեցին լքել այն, իսկ ՌԴ նախագահ Վլադիմիր Պուտինն իր հերթին հայտարարեց՝ Ավստրիայի խաղաղապահներին կարող են փոխարինել ռուս զինծառայողները։