Ֆրանսիական Airbus ավիաընկերությունը ամենայն հավանականությամբ մինչև տարեվերջ Իրանին կմատակարարի ևս 3 միավոր քաղաքացիական ինքնաթիռ։ Այս մասին հայտարարել է Իրանի խորհրդարանի քաղաքացիական հանձնաժողովի խոսնակ Սոդեիֆ Բադրին։ Փոխանցում է իրանական «Թասնիմ» լրատվական գործակալությունը։
Հիշեցնենք,որ 2016 թ. իրանական Iran Air ավիաընկերությունը Airbus-ի հետ համաձայնության էր եկել Իրանին 100 միավոր մարդատար ինքնաթիռ վաճառելու շուրջ։ Մատակարարումները Airbus-ը սկսել է 2017-ի հունվարին։Ըստ Բադրիի՝ եվրոպական ընկերությունը առայժմ Իրանին մատակարարել է 3 միավոր ինքնաթիռ։
Քաղաքացիական ինքնաթիռներ գնելու պայմանագիր Իրանը կնքել է նաև ամերիկյան Boeing ընկերության հետ։ Իրանի խորհրդարանի քաղաքացիական հանձնաժողովի խոսնակը հավելել է, որ Միջուկային համաձայնագրից ԱՄՆ դուրս գալուց հետո, Boeing-ը չի պլանավորում Իրանին ինքնաթիռներ մատակարարել։
Հիշեցնենք,որ մայիսի 8-ին ԱՄՆ Ֆինանսների նախարարը հայտարարել է, որ Միջուկային համաձայնագրից դուրս գալուց հետո 90 և 180 օր ժամկետներում կվերականգնեն Իրանի նկատմամբ պատժամիջոցները։ Առաջին 90 օրում նախարարությունը կաշխատի նաև Իրանին քաղաքացիական ինքնաթիռներ վաճառելու համար Boeing և Airbus ավիաընկերությունների արտոնագրերը չեղարկելու ուղղությամբ։
Նկատենք, որ թեև Airbus-ը եվրոպական ընկերություն է, սակայն ինքնաթիռների արտադրության համար նաև ամերիկյան մասեր է օգտագործում, ինչի պատճառով վաճառքի համար պետք է ստանա նաև ԱՄՆ համաձայնությունը: