Իրանի իսլամական հեղափոխության պահապանների կորպուսի (ԻՀՊԿ) զինծառայողները երկրի տարածքում 2 ահաբեկչական խմբի անդամների են ձերբակալել։ Ահաբեկիչները նպատակադրվել էին գործողություններ իրականացնել Իմամ Խոմեյնիի մահվան 29-րդ տարելիցին (հունիսի 3) նվիրված արարողությունների ժամանակ։ Այս մասին հայտարարել է ԻՀՊԿ հրամանատարներից Մոհամմադ Ռեզա Յազդին։ Փոխանցում է իրանական «Թասնիմ» լրատվական գործակալությունը։
Յազդին ահաբեկչական խմբերի ձերբակալման մասին այլ մանրամասներ չի ներկայացրել։
Հիշեցնենք, որ 2017թ. հունիսի 7-ին Իրանի մայրաքաղաք Թեհրանում ահաբեկիչները հարձակվել էին խորհրդարանի շենքի և Իմամ Խոմեյնու դամբարանի վրա։ Հարձակումների հետևանքով սպանվել էր 17, վիրավորվել՝ 52 մարդ։ Ահաբեկչության պատասխանատվությունը իր վրա էր վերցրել «Իսլամական պետություն» ահաբեկչական խմբավորումը։ Ահաբեկիչներին աջակցելու և նրանց ուղղորդելու համար Իրանը մեղադրում է ԱՄՆ-ին և Սաուդյան Արաբիային։
Սա «Իսլամական պետության» կողմից Իրանում իրականացված առաջին ահաբեկչությունն էր։ Մինչ այդ Իրանում տեղի ունեցած ահաբեկչական գործողությունները հիմնականում կազմակերպել են երկրում գործող ահաբեկչական, անջատողական խմբավորումները։