Մայիսի 20-ին Թուրքիայի Աղրը (Արարատ) նահանգի Դողու Բայազեթ գավառում ինքնաշեն պայթուցիկ սարքի պայթելու արդյունքում սպանվել է 2 թուրք զինծառայող: Թուրքական կողմի պնդմամբ՝ պայթուցիկ սարքը տեղադրել է «Քրդստանի աշխատավորական կուսակցություն» (PKK):Այս մասին հայտնում է թուրքական պետական «Անադոլու» գործակալությունը:
Աղբյուրը նշում է, որ զինծառայողները ուղևորվում էին սահման հերթապահություն իրականացնելու համար: Թուրք ուժայինները քուրդ զինյալների դեմ գործողություններ են սկսել:
Թուրքիայի ԶՈւ ԳՇ կայքը հայտնում է, որ մայիսի 10-17-ը PKK-ի դեմ գործողություններում սպանվել է 1 զինծառայող, վիրավովել 5-ը:
Թուրք-քրդական բախումները Թուրքիայի արևելքում և հարավ-արևելքում վերսկսել են դեռևս 2015-ի ամռանից: Քրդերի դեմ գործողություններում ներգրավված են թուրքական բանակը, ժանդարմերիան, ոստիկանությունը:
Բացի Թուրքիայի տարածքից, Թուրքիայի օդուժը նաև պարբերաբար հարվածում է PKK-ի դիրքերին Իրաքի հյուսիսում: Թուրքական բանակը երբեմն Իրաքի հյուսիսում՝ անմիջապես Թուրքիային սահմանակից լեռնային հատվածներում, իրականացնում է նաև փոքրամասշտաբ ցամաքային գործողություններ:
2018-ի հունվարից Թուրքիան քրդական ուժերի դեմ գործողություններ սկսեց նաև Սիրիայի Աֆրին շրջանում: Թուրքիան Սիրիայի քրդական «Ժողովրդական ինքնապաշտպանության ջոկատների»՝ YPG-ին համարում է PKK-ի «սիրիական թև և նույնպես ահաբեկչական կառույց»: