Մայիսի 20-ին հայ-ադրբեջանական զինված ուժերի շփման գծի Նախիջևանի հատվածում հայկական կողմի կրակից սպանվել է Ադրբեջանի ԶՈւ զինծառայող Թաթարով Ադիլ Ալի օղլուն (Tatarov Adil Əli oğlu): Այս մասին հայտնել է Ադրբեջանի ՊՆ կայքը:
Զինծառայողը Ադրբեջանի Աղստաֆայի շրջանի Ղրաղ Քասամանլու գյուղի բնակիչ էր:
Հավելենք, որ ՀՀ ՊՆ մամուլի խոսնակ Արծրուն Հովհաննիսյանը իր ֆեյսբուքյան էջում հայտնել էր, որ Ադրբեջանի զինված ուժերը «ՀՀ Ադրբեջանական սահմանի որոշ հատվածներում ձեռնարկել են ակտիվ ինժեներական աշխատանքներ նպատակ ունենալով՝ բարելավել դիրքերը»:
Մարտի 18-ին ՀՀ ՊՆ նախարար Դավիթ Տոնոյանը այցելել էր Նախիջևանի ուղղությամբ սահմանագիծ և տեղում իրավիճակին ծանոթալուց հետո հրամանատարությանը հանձնարարել էր լինել մշտապես զգոն, չտրվել որևէ սադրանքի, սակայն խստագույնս կանխել հակառակորդի ցանկացած առաջխաղացում։
Նշենք, որ 2018 թվականի ընթացքում մեզ հայտնի է դարձել Ադրբեջանի ԶՈւ զինծառայողների մահվան 11 դեպք. մահացածներից մեկի անունը հայտնի չէ: