Հայկական բանակը «հակառակորդի» սահմանը հատելուն պատասխանում է «Սմերչով». վարժանքներ

ՀՀ ԶՈւ հրթիռային զորամասի անցկացրած զորավարժության սցենարով պայմանական հակառակորդը վարժանքների քողի տակ ուժեր է խմբավորում, հարձակվում, հետ մղվում, ապա վերախմբավորվում և հատում ՀՀ պետական սահմանը, որին ի պատասխան հայկական զինանոցի «Սմերչ» համակարգերը կրակում են առաջանային նշանակետերի և դեսանտագրոհային գումարտակի վրա:

Զորավարժությունը հնարավորինս մոտեցված է իրական մարտական պայմաններին:

Այս մասին հայտնի է դառնում ՊՆ «Զինուժ» հեռուստածրագրի մայիսի 5-ի թողարկումից:

Հրթիռային զորամասը տագնապի ազդանշանով բերվում է մարտական պատրաստականության բարձր աստիճանի և անցնում խնդիրների իրականացմանը:

Ստորաբաժանումը հավանական հակառակորդի հնարավոր հարձակումը կասեցնելու համար «բոլոր տեսակի ուժերով և միջոցներով» գործողություններ է ձեռնարկում:

Վարժանքների սցենարով հակառակորդի զինված ուժերի միավորումներն ու զորամասերը զորավարժություն անցկացնելու պատրվակով խմբավորվում են, իրականացնում ուժերի ու միջոցների ծավալում:

Հիմք ընդունելով հետախուզության տվյալները՝ ՀՀ զինված ուժերի զորամասերը բերվում են մարտական պատրաստականության առաջին աստիճանի:

Հրետանու ուղղորդիչներն ուղղվում են նշանակետին ու սպասում կրակի հրամանին:

Երկրորդ փուլում առաջ տեղաշարժելով կորպուսային և բրիգադային ռեզերվները՝  հակառակորդը սկսում է հարձակումը, ՀՀ ԶՈւ-ին հաջողվում է կասեցնել հակառակորդի առաջխաղացումը, սակայն, «վերախմբավորվելով և վարելով թեժ մարտեր, հակառակորդին այդուհանդերձ հաջողվում է հատել ՀՀ պետական սահմանը»:

Հայկական զորքերի հրամանատարությունը հրամայում է հրթիռային զորամասին՝ պատրաստվել կարևոր օբյեկտների խոցմանը:

Հրթռիային զորամասը «Սմերչ» ՀԿՌԿ կարողությունների ոչ ամբողջ ծավալով հրթիռային հարվածներ է հասցնում պայմանական հակառակորդի առաջնային նշանակետերին:

Զորավարժության երրորդ փուլում առաջադրվում են նոր նշանակետեր, որոնք պետք է խոցել հիմնական դիրքային շրջաններից: ՀՀ զորքերը վերախմբավորվում են և պատրաստվում հակահարվածի: Պապատրաստմանը զուգահեռ հրթիռային զորամասի «Սմերչ» համակարգերը տեղափոխվում են ՀՀ հյուսիսարևելյան շրջան:

Բացազատվելով նոր տեղանքում՝ ՀԿՌՀ խմբային կրակում են ՝ ոչնչացնելով շուրջ 100 կմ հեռավորությամբ (ըստ «Զինուժի») հայտնաբերված հակառակորդի դեսանտագրոհային գումարտակը:

Զորամասի հրամանատարի հաղորդմամբ՝ բոլոր նշանակետերը, թիրախները խոցվել են:

Զորավարժությունը ղեկավարել է գեներալ-լեյտենանտ Գալստյանը: Ընթացքին հետևել են ՊՆ պաշտնակատար Վիգեն Սարգսյանը, ԶՈւ ԳՇ
պետ գեներալ-գնդապետ Մովսես Հակոբյանը:

«Սմերչ» ՀԿՌՀ-ի արձակած հրթիռն օդում. 2018 ապրիլ

«Սմերչի» երկու արձակման կայան մարտական կրակ է վարում. 2018 ապրիլ