Ապրիլի 22-29-ը Կատարում անցկացվել է այդ երկրի և Թուրքիայի ռազմաօդային ուժերի «Բազե – 20» զորավարժությունը: Կատարից վարժանքներին մասնակցում են նաև ցամաքային զորքերի և հատուկ նշանակության ուժերի ստորաբաժանումներ: Այս մասին հայտնում է The Peninsula Qatar պարբերականի կայքը (1, 2):
Վարժանքներին ներգրավված են Կատարի օդուժի Mirage և Alpha Jet ինքնաթիռներ, ուղղաթիռներ, ինչպես նաև Թուրքիայի ՌՕՈւ F-16 կործանիչներ:
Ամեն տարի անցկացվող այս զորավարժության հայտարարվող նպատակն է բարձրացնել ռազմաօդային ուժերի մարտունակությունը Կատարի օդային տարածքը և հատկապես տնտեսական գոտիների անվտանգության ապահովումը, սպաների պատրաստումը, բոլոր տեսակի գործողությունների կազմակերպումը և վերահսկումը հրամանատարական կենտրոններից:
Նշենք, որ մարտի 14-22-ը Կատարի զինված ուժերը անցկացրել են Lion’s Lair – 2018 («Առյուծի որջ – 2018») զորավարժությունը, որին ներգրավված են եղել նաև Թուրքիայի զինուժի ստորաբաժանումներ:
2017-ի ամռանից սկսած Թուրքիայի զինուժը ցամաքային ուժեր է ուղարկում Կատարում տեղակայված թուրքական ռազմաբազա:
Դեռևս 2015-ին Թուրքիան և Կատարը կնքել են ռազմական կրթության, ռազմական արդյունաբերության և Կատարում թուրքական ռազմաբազա տեղակայելու մասին պայմանագիր: Իսկ 2016-ին Կատարի և Թուրքիայի կառավարությունները կնքել են Կատարում թուրքական ռազմաբազա տեղակայելու վերաբերյալ «իրականացման համաձայնագիրը» (implementation agreement): 2017-ի հունիսին այս համաձայնագիրը վավերացրել են Թուրքիայի խորհրդարանը և նախագահը:
Այդ համաձայնագրի շրջանակներում էլ Թուրքիան զորքեր է տեղակայում Կատարում: Բացի այդ Թուրքիայի և Կատարի զինված ուժերը արդեն մի քանի զորավարժություն են անցկացրել 2017-ի ընթացքում:
Հատկանշական է, որ թուրքական կողմը հապճեպ կարգով վավերացրեց այդ պայմանագիրը, այն բանից հետո, երբ արաբական մի շարք երկրներ խզեցին իրենց դիվանագիտական հարաբերությունները Կատարի հետ՝ վերջինիս մեղադրելով ահաբեկչական խմբավորումներին աջակցելու համար:
Կատարի շուրջ ճգնաժամի մասին առավել մանրամասն.