Ապրիլի 29-ին Թուրքիայի հարավարևելյան Շրնաք նահանգում թուրք ուժայինների և «Քրդստանի աշխատավորական կուսակցության» (PKK) բախումներում սպանվել է 1 թուրք զինծառայող: Այս մասին հայտնում է թուրքական պետական «Անադոլու» գործակալությունը:
Նահանգի Բեսթլեր-Դերելեր լեռնային շրջանում քուրդ զինյալները նռանականետներով և ավտոմատներով կրակել են թուրք ուժայինների բազայի վրա, ինչի արդյունքում էլ բախումներում են սկսվել ուժայինների և զինյալների միջև:
Նշենք, որ ըստ Թուրքիայի ԶՈւ ԳՇ պաշտոնական տվյալներով՝ ապրիլի 20-27-ը PKK-ի հետ բախումներում սպանվել է 3 թուրք զինծառայող, վիրավորվել ևս 8-ը:
Վերջին շրջանում թուրք-քրդական բախումները կրկին ինտենսիվացել են: Դրանք հիմնականում ընթանում են Թուրքիայի արևելյան և հարավարևելյան, հիմնականում քրդաբնակ նահանգներում:
2015-ի ամռանից սկսված թուրքական կողմը քուրդ զինյալների դեմ գործողություններում ներգրավվել է բանակի տարբեր ստորաբաժանումներին, ժանդարմերիային, ոստիկանության հատուկ նշանակության ուժերին: