ՊԲ հյուսիսարևելյան ուղղությամբ տեղակայված զորամասերից մեկի մարտական հերթապահությունում ընդգրկված զինատեսակները համալրվել են նոր զինատեսակներով, ինչը մի քանի անգամ բարձրացել է կրակային խոցման արդյունքները: Այս մասին ՊՆ «Հայ Զինվոր» պաշտոնաթերթին հայտնել է զորամասի հրամանատարի տեղակալ փոխգնդապետ Կարեն Սիմոնյանը:
«Օրինակ՝ խոշոր տրամաչափի «Կորդ» գնդացիրը, որի օպտիկական նշանոցն ապահովում է դիպուկություն և կրակի վարման հեռահարություն, կամ ձեռքի հակատանկային նռնականետը` նորագույն նշանոցով ՌՊԳ-7-ը, որ նախատեսված է բեկորային նռնակներով հրաձգություն վարելու համար:
«Կորդ» գնդացիրը հյուսիսարևելյան դիրքերից մեկում
…Հաճախ ենք զորամասի լսարաններում, կրակադաշտում, բացազատված ուսումնական տեղամասերում կազմակերպում եռօրյա, հնգօրյա տեսական ու գործնական պարապմունքներ: Մանրակրկիտ բացատրում ենք նոր զենքերի հետ վարվելու նրբությունները՝ շեշտը դնելով անվտանգության կանոնների խստիվ պահպանման և անվրեպ, թիրախային խոցման վրա:»,—մասնավորապես տեղեկացրել է փոխգնդապետը:
Նշենք, որ սրանից ավելի վաղ ՀՀ ԶՈւ զորամասերից մեկի հրամանատարն էր հայտնել, որ առաջնագիծը համալրվել է «Կորդ» գնդացիրներով:
«Կորդը» ռուսաստանյան արտադրության 12,7 մմ տրամաչափի գնդացիր է, որի խոցման հեռավորությունը 2000 մ է: Նախատեսված է հիմնականում հակառակորդի կենդանի ուժի ոչնչացման, թեթև զրահապատված մարտական տեխնիկայի և կրակային միջոցների դեմ պայքարի համար: