Ապրիլի 17-ին Ռուսաստանի սահմանադրական դատարանը թույլատրել է մագիստրատուրայում տարկետմամբ սովորել, եթե անգամ այդ տարկետումը թվով երրորդն է: Այս մասին հայտնում է «ՌԻԱ Նովոստի» գործակալությունը:
Կփոփոխվի նաև գործող օրենքը, որով Ռուսաստանում սովորելու համար տարկետում տրվում է երկու անգամ:
Սա հնարավորություն չի տալիս ուսանողներին մագիստրատուրայում սովորել տարկետմամբ, եթե նրանք չափահաս լինելու պատճառով դպրոցում ուսումն ավարտելու համար արդեն ստացել են տարկետում: Այսպիսով, ըստ գործակալության, անհավասար պայմաններ էին ստեղծվում ուսանողների համար:
Ռուսաստանում զորակոչը մեկնարկել է ապրիլի 1-ից: Այս տարի նախատեսվում է բանակը համալրել 128 հազար երիտասարդով:
Հայաստանում նախկինում տարկետում ստանում էին բուհերում անվճար սովորելու համար: Ուսանողը կարող էր ակադեմիական տարկետում ստանալ երեք անգամ, երրորդ տարկետումը ստացած և ասպիրանտուրան բարեհաջող ավարտած քաղաքացին ստանում էր գիտական կոչում և ազատվում բանակից:
Սակայն օրենքի փոխվելուց հետո այժմ Հայաստանում ակադեմիական տարկետում կարող են ստանալ գիտական խոշոր նվաճումներ ունեցող քաղաքացիները, ինչպես նաև ՊՆ-ի հետ «Պատիվ ունեմ» ծրագրով պայմանագիր կնքած երիտասարդները: