ՌԴ ԶՈւ հարավային ռազմական շրջանի՝ Վոլգոգրադում տեղակայված զենիթահրթիռային ստորաբաժանումները, դաշտային ելքի շրջանակներում մարտական կրակով վարժանքներ են արել Կապուստին Յար զորավարժարանում։ Այս մասին ապրիլի 13-ին տեղեկացնում է ՌԴ ՊՆ կայքը։
Վարժանքներին զինծառայողները մշակել են պայմանական հակառակորդի օդային թիրախները ոչնչացնելու, ինչպես նաև սեփական ավիացիայի թռիչքները ապահովելու հարցեր։
Վարժանքների ընթացքում մշակվել է 40-ից ավելի առաջադրանք, պայմանականորեն ոչնչացվել ավելի քան 30 թիրախ։ Առաջադրված խնդիրները զինծառայողները կատարել են պայմանական հակառակորդի կողմից զանգվածային ոչնչացման զենք գործադրելու պայմաններում։
Վարժանքներին ներգրավվել է շուրջ 100 զինծառայող, մի քանի տասնյակ միավոր զինտեխնիկա, այդ թվում՝ «Ստրելա-10» զենիթահրթիռային համալիրներ, «Տունգուսկա» զենիթային հրանոթահրթիռային համալիրներ։