2018-ի մարտին Թուրքիայում ԻՊ-ի հետ «կապ ունենալու մեղադրանքով» 245 մարդ է ձերբակալվել. Anadolu

2018-ի մարտ ամսվա ընթացքում Թուրքիայի ուժային կառույցները ձերբակալել են 245 մարդու, ովքեր կասկածվում են «Իսլամական պետություն» ահաբեկչական խմբավորման անդամ լինելու կամ այդ կառույցի հետ կապ ունենալու համար: Այս մասին հայտնում է թուրքական պետական «Անադոլու» գործակալությունը:

Ձերբակալվածներից 51-ն արդեն իսկ ենթարկվել են մի քանի տարվա ազատազրկման, մյուսների դատական գործընթացները դեռևս շարունակվում են: Ձերբակալվածների մի մասը այլ երկրների քաղաքացիներ են: Ըստ աղբյուրի՝ ձերբակալվածների շարքում կան նաև «Իսլամական պետության» ղեկավար կադրեր:

Թուրքիայի ոստիկանությունը ձերբակալել է Սիրիայի Ռաքքա քաղաքում «Իսլամական պետության» ֆինանսական հարցերով ղեկավարին. (արխիվ)

Թուրքիայի ոստիկանությունը ձերբակալել է Սիրիայի Ռաքքա քաղաքում «Իսլամական պետության» ֆինանսական հարցերով ղեկավարին. (արխիվ)

Նշենք, որ Թուրքիան տարբեր ահաբեկչական խմբավորումների և մասնավորապես ԻՊ-ի համար Սիրիա և Իրաք հասնելու կամ այնտեղից դուրս գալու հիմնական տարանցիկ ուղիներից մեկն է:

Ըստ բրիտանական The Economist հանդեսի՝ «Իսլամական պետության» զինյալները Իրաքում և Սիրիայում պարտություն կրելուց հետո այդ երկրներից դուրս են բերել շուրջ 400 միլիոն ամերիկյան դոլար: Զինյալների գումարների մի մասը տարբեր միջոցներով հայտնվել է Թուրքիայում, որտեղ էլ դրանք օգտագործվում են կազմակերպության «քնած բջիջները» պահելու համար: Հանդեսի հետազոտությանը մանրամասն կարող եք ծանոթանալ այստեղ:

Ավեի վաղ էլ թուրքական մի քանի ԶԼՄ-ներում տեղեկություններ են տարածվել, որ ԻՊ զինյալները պատերազմական գոտիներից Թուրքիա անցնելու, այնտեղից էլ իրենց երկրներ վերադառնալու համար 3000 ամերիկյան դոլար գումար են վճարում թուրքական կողմին:

Նմանատիպ տեղեկություններ էր 2017-ի հոկտեմբերին տարածել նաև սիրիական մերձընդդիմադիր, Լոնդոնում տեղակայված «Մարդու իրավունքների սիրիական դիտարան» (Syrian Observatory for Human Rights) կազմակերպությունը: Ըստ դրա՝ «Իսլամական պետության» տասնյակ դաշտային հրամանատարներ հազարավոր դոլարներ են վճարում Թուրքիայի տարածք անցնելու համար:

«Իսլամական պետության» տարբեր մեթոդներով ստացված գումարների վիճակագրություն. աղբյուրը՝ The Economist

«Իսլամական պետության» տարբեր մեթոդներով ստացված գումարների վիճակագրություն. աղբյուրը՝ The Economist

Մեկնաբանել

Ձեր էլ. փոստի հասցեն չի հրատարակվելու: Պարտադիր դաշտերը նշված են *