Այսօր մեկնարկեց բժշկական կազմի սպաների զորակոչը: ՀՀ ՊՆ տվյալների համաձայն՝ նոյեմբերին Ադրբեջանը հրադադարի ռեժիմը խախտել է 1150 անգամ: «Հայաստանը խախտում է «սպառազինությունների մասին» պայմանագիրը». Բրյուսելում հայտարարել է Արթուր Սաքունցը: Թուրքիան դիտարկում է Սիրիայի հետ սահմանում բուֆերային գոտու ստեղծման հնարավորությունը: Սիրիան էլ այդ ընթացքում Ռուսաստանից ստացել է «Բաստիոն» ափային համալիրներ՝ «Յախոնտ» հականավային թևավոր հրթիռներով:
- Նախագահ Սերժ Սարգսյանը հրամանագիր է ստորագրել ՀՀ Զինված ուժերի պահեստազորի առաջին խմբի բժշկական կազմի սպաների զորակոչ անցկացնելու և զորացրում կատարելու մասին:
- Ադրբեջանը նոյեմբերին ՀՀ սահմանին հրադադարը խախտել է ավելի քան 200, ԼՂՀ սահմանին՝ 950 անգամ:
Բրյուսելում կայացած ՆԱՏՕ–ի սեմինար-հանդիպմանը, Հելսինկյան Ասոցիացիայի Վանաձորի գրասենյակի ղեկավար Արթուր Սաքունցը հայտարարել է, թե Հայաստանը խախտում է «Եվրոպայում սովորական զինված ուժերի մասին պայմանագրի (ԵՍԶՈՒՊ) դրույթները»:
Տարածաշրջանային լուրերից: Թուրքիան դիտարկում է` Սիրիայի հետ սահմանին բուֆերային գոտու ստեղծման հնարավորությունը և այդ հարցում կգործի Արաբական պետությունների լիգայի հետ համատեղ: Հայտարարել է Թուրքիայի փոխվարչապետ Բյուլենթ Առինչը:
Մինչ այդ Սիրիան Ռուսաստանից ստացել է «Բաստիոն» ափային համալիրներ՝ «Յախոնտ» հականավային թևավոր հրթիռներով. այդ սպառազինությունը հնարավորություն կտա պաշտպանել Սիրիայի ամբողջ ափամերձ տարածքը ծովից հարձակման դեպքում: Ի դեպ. ուշագրավ է նաև այն փաստը, որ Սիրիայի նախագահ Բաշար Ասադը պաշտոնանկ է արել պաշտպանության նախարար, գեներալ Ալի Հաբիբ Մահմուդին և այդ պաշտոնում նշանակել գլխավոր շտաբի պետ, գեներալ Դաուդ Ռաջիհին, ով ուղղափառ քրիստոնյա է: