Ինչ պայմաններով են «Պատիվ ունեմ» ծրագրով զորակոչվելու․ մանրամասներ

«Պատիվ ունեմ» ծրագրով զինծառայություն անցնելու պայմանագրի նախնական օրինակը հրապարակվել է e-draft.am կայքում, որը նախագծերի հանրային քննարկման համար է: Ներկայացնում ենք պայմանագրի հիմնական կետերը։ 

[Լրացում] Փաստաթուղթն ընդունվել է:

Ծրագրի մասնակիցը ունի բուհում անվճար սովորելու և ուսման ժամկետով զինծառայությունից տարկետում ստանալու իրավունք։ Ուսման և զինվորական պատրաստության ավարտից հետո կնքվում է պաշտպանության նախարարության նշած վայրում զինծառայություն անցնելու մասին նոր պայմանագիր։

3 տարի որպես սպա ծառայելուց հետո 2 տարվա ընթացքում կարող է Հայաստանում մագիստրատուրա ընդունվել և սովորել անվճար։ 

Զորակոչիկը պարտավոր է անցնել զինվորական պատրաստություն, պահել ՌՈւՀ-ի կարգ ու կանոնը: Նախարարության  կողմից պարտավորությունների խախտման դեպքում նա իրավունք ունի բողոքարկել պաշտպանության նախարարին կամ դատարան:

Բացի զորքերում դասակների հրամանատարների պաշտոններում ծառայելուց, քաղաքացին իրավունք ունի նաև ծառայել բժշկական պաշտոնում, ուսումից և զինպատրաստությունից հետո նա գործուղվելու է կլինիկական ռեզիդենտուրա և դրա ավարտից հետո, լեյտենանտի կոչում ստանալով, նշանակվելու է համապատասխան պաշտոնի։

Պայմանագրից հրաժարվելու, բուհում ուսումից կամ զինվորական պատրաստությունից անկախ պատճառների ազատվելու դեպքում 1 ամսվա ընթացքում պարտավորվում է միանվագ վճարել բուհում իր ուսման վարձի հանրագումարի կրկնապատիկը՝ որպես հրաժարագին։ Հրաժարագնի 50 տոկոսը բուհը վերադարձնում է պետբյուջե, 10 տոկոսը՝ ՊՆ
արտաբյուջետային հաշիվ, իսկ 40 տոկոսը տնօրինում է ՀՀ օրենսդրությամբ սահմանված կարգով:

Զինպատրաստությունից ազատվում/հեռացվում են.

  • սեփական կամքով,
  • քաղաքացիական բուհից անկախ պատճառներից ազատվելու և  հեռացվելու դեպքում,
  •  մեկ ուստարվա ընթացքում անկախ պատճառներից 32 ակադեմիական ժամից ավելի բացակայելու դեպքում,
  • դասընթացի ավարտին 30 օր տևով հավաքին 3 օրից ավելի չմասնակցելու դեպքում,
  • ՌՈւՀ ներքին կարգ ու կանոնը չպահպանելու պատճառով,
  • զինդասընթացի միջանկյալ ստուգարքները, ավարտական քննությունները չհանձնելու դեպքում:

Զինվորական պատրաստությունը 2 տարի 6 ամսով է՝ բուհում ուսման 3-7 կիսամյակների ընթացքում: Մեկ օրվա դասընթացի տևողությունը չի կարող գերազանցել 7 ժամը:

Ծրագրի մասնակիցները ընտրվում են մրցույթով։ Պաշտպանության նախարարությունը ներկայացնում է զինվորական պաշտոնների համալրման համար անհրաժեշտ ընդունելության տեղերի թվաքանակը։ Ինչից հետո Գնահատման և թեստավորման կենտրոնը անցկացնում է մրցույթ։

Մեկնաբանել

Ձեր էլ. փոստի հասցեն չի հրատարակվելու: Պարտադիր դաշտերը նշված են *