Եմենում պնդում են, թե ցամաքից «օդ-օդ» հրթիռով սաուդական F-15 են խոցել

Երեկ՝ մարտի 21-ին, Եմենում գործող Հութի շիայական խմբավորումը հրապարակել է տեսանյութ, որտեղ պնդում են, թե «ՀՕՊ համակարգով» խոցել են Սաուդյան արաբիայի օդուժի F-15 կործանիչ: Հութիներն օգտագործել են խորհրդային արտադրության Ռ-27Տ «օդ-օդ» դասի հրթիռ՝ ցամաքից:

Տեսանյութից հստակ հնարավոր չէ եզրակացնել, թե արդյոք սաուդական ռազմական ինքնաթիռը խոցվում է, թե ոչ:

Shouth Front կայքը հիշեցնում է, որ հութիները նման փորձեր էլի են կատարել: 2017 թ. Եմենի շիայական խմբավորումը հայտարարել էր, որ Ռ-27 հրթիռները տեղակայել են ցամաքային կայանի վրա և կօգտագործեն որպես «ցամաք-օդ» դասի հրթիռ:

Ավելին՝ հութիները մի քանի անգամ արդեն փորձարկել են համակարգը: Հոկտեմբերին Հութիները կարողացել էին այս հրթիռով խոցել ամերիկյան MQ-9 Reaper խոշոր անօդաչու թռչող սարք:

Ի տարբերություն ԱԹՍ-ի՝ ինքնաթիռների վրա փորձարկումները մինչ այս հաջող չէին: Նախորդ տարվա մայիսին հութիներն այս հրթիռով չէին կարողացել խոցել սաուդական F-15, իսկ հունիսին՝ Միացյալ արաբական Էմիրությունների օդուժի F-16 կործանիչ:

Ըստ Shouth Front-ի տվյալների՝ նախկինում «օդ-օդ» հրթիռները «ցամաք-օդ» դասի վերածելու քայլեր իրականացրել էին սերբերը: Սակայն սերբական կողմը, ի տարբերություն հութիների, նաև հրթիռի արձակման արագացուցիչներ էր օգտագործել:

Հիմնական խնդիրն այն է, որ հրթիռի առավելագույն հեռահարությունը՝ մինչև 50 կմ, հաշվարկված է այն դեպքում, երբ հրթիռն արձակվում է արդեն իսկ բավականին մեծ արագությամբ շարժվող ինքնաթիռից: Ցամաքային թիրախից արձակելու դեպքում հեռահարությունը և արագությունը նվազում են:

Մեկնաբանել

Ձեր էլ. փոստի հասցեն չի հրատարակվելու: Պարտադիր դաշտերը նշված են *