Մարտի 17-ին ՀՀ ՊՆ ռազմական ոստիկանությունում անցկացվել է նորաստեղծ խաղաղապահ դասակի համալրման նպատակով հայտարարված մրցույթի ամփոփման երկրորդ փուլը: Այս մասին հայտնում է ՀՀ ՊՆ կայքը:
ՀՀ ՊՆ ռազմական ոստիկանության խաղաղապահ դասակի համալրման մրցույթի երկրորդ փուլը
Մրցութային հանձնաժողովը՝ ՀՀ ՊՆ ռազմական ոստիկանության պետ, գնդապետ Արթուր Բաղդասարյանի նախագահությամբ, քննարկել է խաղաղապահ դասակի համալրման հայտ ներկայացրած քաղաքացիների դիմումները, հարցազրույց անցկացրել թեկնածուների հետ՝ տեղում ստուգելով նրանց մասնագիտական ունակությունները:
Մրցույթի առաջին փուլն անցկացվել էր փետրվարի 14-ին:
ՀՀ ՊՆ ռազմական ոստիկանության կենտրոնական ապարատում 2018թ. հունվարին ստեղծվել է նոր ստորաբաժանում՝ խաղաղապահ դասակ, որը կմասնակցի ՀՀ խաղաղապահ առաքելություններին:
Խաղաղապահ դասակը կազմված է հետաքննչական, զինավտոտեսչության և պարետային ծառայության խմբերից:
Համալրման համար առաջնահերթությունը տրվում է համապատասխան բարձրագույն մասնագիտական կրթություն ունեցող, երկու և ավել օտար լեզուների տիրապետող և պարտադիր զինվորական ծառայություն անցած մինչև 35 տարեկան ՀՀ քաղաքացիներին:
Մրցույթին մասնակցելու ցանկություն ունեցող անձինք ինքնակենսագրությունը (CV) կարող են ներկայացնել ՀՀ ՊՆ ռազմական ոստիկանություն (հասցե՝ ք. Երևան, Ծովակալ Իսակովի պող., 18/10):
Լրացուցիչ տեղեկությունների համար զանգահարել (010) 42-94-93 հեռախոսահամարով:
Նշենք, որ վերջերս ՀԱՊԿ գլխավոր քարտուղարի տեղակալ Վալերի Սեմերիկովը տեղեկացրել էր, որ ՀԱՊԿ-ը ոստիկանական մշտական պատրաստության հատուկ ստորաբաժանում է կազմավորում և չի բացառում ռազմական ներուժի օգտագործումը: Իսկ ստորաբաժանումը կարող է ներգրավվել նաև ՄԱԿ-ի առաքելություններին:
Այս մասին Սեմերիկովը հայտնել էր նաև դեռևս 2017-ի ամռանը. «Ստորաբաժանման անձնակազմի անդամները կհավաքվեն անդամ բոլոր պետությունների իրավապահ մարմիններից: Բոլոր երկրներն արդեն տվել են իրենց համաձայնությունը»: