Վրաստանի ընդդիմադիր Լեյբորիստական կուսակցությունն այսօր պաշտոնական հայտ է ներկայացրել Աֆղանստանից վրացի խաղաղապահների դուրս բերման վերաբերյալ:
Մամուլի հաղորդագրության մեջ նշվում է, որ համաձայն ԿԸՀ ներկայացրած դիմումի՝ Լեյբորիստական կուսակցությունն առաջարկում է հոկտեմբերին Վրաստանի նախագահական ընտրություններին զուգահեռ անցկացնել Աֆղանստանից վրացական զորքերի դուրս բերման վերաբերյալ հանրաքվե: Շաբաթ օրը Թբիլիսիում տասնյակ ցուցարարներ նույն պահանջն էին ներկայացրել կառավարությանը։
Լեյբորիստները համարում են, որ եթե իշխանությունները չեն պատրաստվում լուծել այդ խնդիրը, ապա դա պետք է անի Վրաստանի ժողովուրդը՝ հանրաքվեի օգնությամբ:
Վերջին օրերի ընթացքում մի շարք քաղաքական և հասարակական գործիչներ ևս բարձրացրել են Աֆղանստանից խաղաղապահների դուրս բերման հարցը:
Այնուհանդերձ, նրանց հարկավոր է ավելի քան 200 հազար ստորագրություն, ուստի Վրաստանի նախկին նախագահ Էդուարդ Շևարդնաձեն խորհուրդ է տալիս առանց ստորագրահավաքի արտահայտել իրենց դիրքորոշումը, իսկ ՆԱՏՕ-ի անդամ լինելու համար բնավ պարտադիր չէ խաղաղապահներ ունենալ այլ երկրներում։
Հիշեցնենք, որ դեռևս 2001-ին հենց Շևարդնաձեն էր պնդել, որ վրացի խաղաղապահները մեկնեն Կոսովո, ապա Իրաք՝ պատճառաբանելով՝ դա կնպաստի «ՆԱՏՕ-ի հետ հարաբերությունների սերտացմանը»։
Կառավարող կոալիցիայի առաջատար խմբավորում «Վրացական երազանքը» ևս տեսակետ է արտահայտել փաստի առնչությամբ։ Խմբավորման ներկայացուցիչները հիշեցրել են հունիսի 6-ին Հիլմենդում ահաբեկչության պատճառով զոհված վրացի 7 զինծառայողների մասին՝ շեշտելով, որ ահաբեկչության հիմնական առիթը Սաակաշվիլիի «անպատասխանատու հայտարարությունն էր»։ Պատգամավոր Զվիադ Ձիձիգուրին հավաստիացրել է՝ երբ Սաակաշվիլին մայիսի 26-ին այցելել էր Հիլմեդի ռազմաբազա, նրա առաջարկով հրամանատարներից մեկը վրացի զինվորներին տեսախցիկի առջև հարցրել էր՝ քանի թալիբ են սպանել և ինչպես են դա արել, թալիբներն էլ այդպիսով որոշել են իրենց թիրախը։
Միաժամանակ հայտնի է դարձել, որ Վրաստանի ՆԳՆ-ն սկսել է հետաքննել «վրացի խաչակիրներին» ուղղված սպառնալիքներով տեսանյութի ծագումը, որը, իբր թալիբների անունից էր տեղադրվել YouTube-ում հունիսի 5-ին։ Կասկածներ կան, որ տեսանյութը տեղական արտադրության է և միտված է նախագահի դիրքերի թուլացմանը, ուստի չի բացառվում, որ այն ստեղծվել ու տարածվել է վարչապետի մերձավորների հրահանգով։
Այնուամենայնիվ, նախագահն ու վարչապետը դեռևս համակարծիք են վրացի խաղաղապահներին Աֆղանստանից դուրս չբերելու հարցում՝ հիմնավորելով, որ դա լավ չի անդրադառնա Արևմուտքի հետ հարաբերությունների վրա։