Մարտի 14-ին ՀՀ ԱԺ պաշտպանության և անվտանգության հարցերի մշտական հանձնաժողովը երկրորդ ընթերցմամբ քննարկել է և դրական եզրակացություն է տվել «Զինվորական ծառայության և զինծառայողի կարգավիճակի մասին» օրենքում լրացում կատարելու մասին օրենքի նախագծին։ Այս մասին հայտնում է ԱԺ կայքը:
Լրացմամբ առաջարկվում է տարկետում տալ ոչ միայն Հայաստանում, այլև նաև այլ երկրներում հանրակրթական և նախնական (արհեստագործական) կրթական ծրագրով սովորող անձանց:
Առաջին ընթերցումից հետո առաջարկություններ չէին ներկայացվել։ Հանձնաժողովը առաջարկել է այն ընդգրկել հերթական նիստերի օրակարգի նախագծում:
Այս պահին զինծառայության մասին օրենքով պարտադիր զինծառայությունից ակադեմիական տարկետում կարող են ստանալ «Պատիվ ունեմ» ծրագրից օգտվելու դեպքում, ինչպես նաև հիմնական կրթության հիմքի վրա առանց ընդհատման նախնական կրթական ծրագրերով ՀՀ-ում սովորողին։
Օրենքում լրացում կատարելու նախագիծը ավելի վաղ՝ հունվարի 25-ին քննարկվել էր կառավարության նիստի ընթացքում: Փոփոխությունն առաջարկել է ՀՀ ԱԺ պատգամավոր Միհրան Պողոսյանը: