Թուրքիայի պաշտպանության նախարարը այցելել է Կատարում թուրքական ռազմաբազա

Մարտի 13-ին Թուրքիայի պաշտպանության նախարար Նուրեթթին Ջանիքլին պաշտոնական այցով եղել է Կատարում: Նա նաև այցելել է Դոհայում տեղակայված Թուրքիայի ԶՈւ ռազմաբազա և հանդիպել այնտեղ ծառայող թուրք զինծառայողներին: Այս մասին հայտնում է Թուրքիայի ՊՆ-ն Twitter-ի միկրոբլոգում:

Նույն օրը Ջանիքլին հանդիպել է նաև Կատարի վարչապետ և ներքին գործերի նախարարին: Այցի և հանդիպումների մասին այլ մանրամասներ չեն հրապարակվել:

Դոհայում մարտի 12-14-ը անցկացվում է միջազգային DIMDEX —2018 ռազմարդյունաբերական ցուցահանդես: Հնարավոր է, որ Ջանիքլին նույնպես մասնակցում է ցուցահանդեսին:

Հիշեցնենք, որ մարտի 11-ին Կատարում թուրքական ռազմաբազա են այցելել նաև  Թուրքիայի ԶՈւ գլխավոր շտաբի պետ, բանակի գեներալ Հուլուսի Աքարը և  ռազմածովային ուժերի հրամանատար Ադնան Օզբալը:

2017-ի ամռանից սկսած Թուրքիայի զինուժը  ցամաքային ուժեր է ուղարկում Կատարում տեղակայված թուրքական ռազմաբազա: Կատարում Թուրքիայի դեսպանը հայտարարել է, որ  ի լրումն ցամաքային զորքերի, այդ երկրում տեղակայվելու են նաև ռազմածովային և ռազմաօդային ուժեր:

Դեռևս 2015-ին Թուրքիան և Կատարը կնքել են ռազմական կրթության, ռազմական արդյունաբերության և Կատարում թուրքական ռազմաբազա տեղակայելու մասին պայմանագիր: Իսկ 2016-ին Կատարի և Թուրքիայի  կառավարությունները կնքել են Կատարում թուրքական ռազմաբազա տեղակայելու վերաբերյալ իրականացման համաձայնագիրը» (implementation agreement): 2017-ի հունիսին այս համաձայնագիրը վավերացրել են Թուրքիայի խորհրդարանը և նախագահը:

Այդ համաձայնագրի շրջանակներում էլ Թուրքիան զորքեր է տեղակայում Կատարում:  Բացի այդ Թուրքիայի և Կատարի զինված ուժերը արդեն մի քանի զորավարժություն են անցկացրել:

Հատկանշական է, որ թուրքական կողմը հապճեպ կարգով վավերացրեց այդ պայմանագիրը, այն բանից հետո, երբ արաբական մի շարք երկրներ խզեցին իրենց դիվանագիտական հարաբերությունները Կատարի հետ՝ վերջինիս մեղադրելով ահաբեկչական խմբավորումներին աջակցելու համար:

Կատարի շուրջ ճգնաժամի մասին առավել մանրամասն.

Մեկնաբանել

Ձեր էլ. փոստի հասցեն չի հրատարակվելու: Պարտադիր դաշտերը նշված են *