Մարտի 13-ին Սիրիայի Աֆրին շրջանում և Թուրքիայի հարավա-արևելքում քրդական ուժերի դեմ գործողությունների ընթացքում սպանվել է 4 թուրք զինծառայող, վիրավորվել է ևս 4-ը: Այս մասին հայտնում են թուրքական ԶԼՄ-ները:
Մարտի 13-ին Թուրքիայի Դիարբեքիր նահանգի Դիջլե գավառում «Քրդստանի աշխատավորական կուսակցության» (PKK) զինյալների դեմ գործողությունների ժամանակ ինքնաշեն պայթուցիկ սարք է պայթել, որի արդյունքում սպանվել է 3 զինծառայող, վիրավորվել ևս 2-ը: Վիրավորներից 2-ի վիճակը ծանր է: Հայտնում է թուրքական «Հյուրիեթ» պարբերականի կայքը:
Թուրքական ուժայինները Դիարբեքիրի Սուր գավառում. Հունվարի 31, 2016 թ.
Նույն օրը թուրքական պետական «Անադոլու» գործակալությունը հայտնել է, որ Սիրիայի Աֆրին շրջանում քրդական «Ժողովրդական ինքնապաշտպանության ջոկատների»՝ YPG-ի դեմ գործողությունների ժամանակ սպանվել է ևս 1 թուրք զինծառայող:
Հիշեցնենք, որ մարտի 12-ին Թուրքիայի տարածքում և Սիրիայի Աֆրին շրջանում քրդական ուժերի դեմ գործողությունների ընթացքում սպանվել է ևս 2 թուրք զինծառայող: Այսինքն վերջին 2 օրում թուրքական կողմը քրդերի հետ բախումներում կորցրել է 6 զինծառայող:
Նշենք, որ Թուրքիան Սիրիայի քրդական ուժերին համարում է PKK-ի «սիրիական ճյուղ և ահաբեկչական կառույցներ»: Սիրիայի քրդերի դեմ Թուրքիայի զինուժը և նրանց աջակցող զինյալները գործողություն են սկսել հունվարի 20-ից: Մինչև այժմ, ըստ թուրքական պաշտոնական տվյալների՝ Թուրքիան Աֆրին ունեցել է 42 զինծառայողի կորուստ, 200-ից ավել վիրավոր:
Միևնույն ժամանակ, թուրք ուժայինները շարունակում են PKK-ի զինյալների դեմ գործողությունները երկրի արևելյան և հարավարևելյան նահանգներում: Թուրք-քրդական բախումները, հարաբերական դադարից հետո, վերսկսել են դեռևս 2015-ի ամռանից և արդեն շուրջ 2,5 տարի է շարունակվում են: