[Թարմացված] Իրանա-պակիստանյան սահմանին ԻՀՊԿ-ն մահապարտ ահաբեկիչների է վնասազերծել

Մարտի 11-ին Իրանի՝ Պակիստանին սահմանակից Սիսթան և Բելուջիստան նահանգի Սարավան շրջանում մահապարտ ահաբեկիչները փորձել են մեքենա պայթեցնել Իրանի իսլամական հեղափոխության պահապանների կորպուսի (ԻՀՊԿ) սահմանային պահակակետերից մեկի մոտ։ ԻՀՊԿ զինծառայողները կանխել են գործողությունը. մեկ ահաբեկիչ սպանվել է, ևս մեկը պայթեցրել է իրեն։Այս մասին տեղեկացնում է ԻՀՊԿ «Սեփահնյուզ» լրատվակայքը։

Հակաահաբեկչական գործողության ընթացքում վիրավորվել է նաև ԻՀՊԿ 2 զինծառայող։ Միջադեպի մասին ԻՀՊԿ-ն այլ մանրամասներ չի հաղորդել։

 ԻՀՊԿ զինծառայողներ

ԻՀՊԿ զինծառայողներ

[Թարմացում] ԻՀՊԿ-ն հայտարարել է, որ սահմանային պահակակետի վրա հարձակվել են «Ջեյշ ալ Ադլ» ահաբեկչական խմբավորման 40 զինյալ։ ԻՀՊԿ զինծառայողների հետ բախման արդյուքնում սպանվել է 4 զինյալ, «մի քանիսը» վիրավորվել են, իսկ մյուսները փախուստի են դիմել։ Մարտի 13-ին հայտնում է իրանական «Ֆարս» լրատվական գործակալությունը։

Հիշեցնենք, որ 2017թ. հուլիսի 15-ին փոխհրաձգություն էր եղել իրանա-պակիստանյան սահմանին։ Պակիստանից գործող ահաբեկչական խումբը կրակ էր բացել Սարավան շրջանի ուղղությամբ, ինչի հետևանքով 2 իրանցի զոհվել էր։

ԻՀՊԿ պատասխան կրակի արդյունքում սպանվել էր մեկ ահաբեկիչ, ևս 2-ը վիրավորվել էին։

Ավելի վաղ՝ 2017թ. ապրիլին, իրանա-պակիստանյան սահմանին տեղի ունեցած զինված միջադեպի հետևանքով սպանվել էր Իրանի սահմանապահ ծառայության 10 զինծառայող, ևս 3-ը վիրավորվել էին։

Հանցագործության պատասխանատվությունը ստանձնել էր «Ջեյշ ալ զոլմ» ահաբեկչական խմբավորումը։

Պակիստանի և Իրանի միջև սահմանը 900 կմ է։ Այստեղ Իրանը ակտիվ պայքար է մղում Պակիստանից ներթափանցող ահաբեկչական խմբավորումների, մաքսանենգների դեմ։

Իրանի Սիսթան և Բելուջիստան ու Պակիստանի համանուն՝ Բելուջիստան սահմանակից նահանգներում գործում են հիմնականում սուննի բելուջներից կազմված զինված անջատողական խմբավորումներ, որոնք հաճախ են բախումների մեջ մտնում Իրանի ուժային կառույցների հետ։ Հատկապես ակտիվ են գործում «Ջեյշ ալ Ադլ» («Ջեյշ ալ Զոլմ») և «Ջունդոլլահ» խմբավորումները։

Մեկնաբանել

Ձեր էլ. փոստի հասցեն չի հրատարակվելու: Պարտադիր դաշտերը նշված են *