Ղազախստանում հավաքվող «Բարիս 8» (Barys 8) զրահափոխադրիչը երկրի պաշտպանության նախարարության կողմից փորձարկումներից հետո գնահատման վերջին փուլում է: Դրանից հետո միայն զրահափոխադրիչը կընդունվի սպառազինություն:
Զորահափոխադրիչը մշակել է հարավաֆրիկյան Paramount Group ընկերությունը և հայտնի է որպես «Մբոմբե 8» (Mbombe 8): Ղազախստանում հավաքում է այդ երկրում Paramount Group-ի մասնաճյուղ Kazakhstan Paramount Engineering-ը (KPE)՝ «Բարիս 8» անունով:
Զրահափոխադրիչը առաջին անգամ ցուցադրվել էր 2016-ի հունիսին Ղազախստանում անցկացվող KADEX 2016 ռազմարդյունաբերական ցուցահանդեսի շրջանակներում: Այն ժամանակ ներկայացվել էր զրահափոխադրիչի՝ AU-220M 57 մմ հրանոթով զինված տարբերակը:
Բրիտանական մասնագիտացված Jane`s ընկերությունը նշում է, որ փորձարկվել է KPE-ի և Kazakhstan Aselsan Engineering-ի (թուրքական Aselsan-ի մասնաճյուղը Ղազախստոնում) համատեղ մշակված տարբերակը: Այս դեպքում «Բարիս 8» զորահափոխադրիչի վրա տեղադրվել է Aselsan-ի 30 մմ-ոց Nefer հրանոթի մոդուլը. մոդուլի հիմքում խորհրդային 2A42 «Շիպունով» ավտոմատ հրանոթն է:
Նշենք նաև, որ Paramount Group-ը համատեղ ձեռնարկություն ունի նաև Ադրբեջանի հետ, որի շրջանակներում հավաքվում են «Մատադոր» և «Մարադյոր» զրահամեքենաները, վերջինս հավաքվում է նաև Ղազախստանում, սակայն կրում է «Արլան» անունը: