Այսօր՝ մարտի 7-ին, ԵԱՀԿ առաքելությունը պլանային դիտարկում է անցկացրել Արցախի շփման գծում՝ Հադրութի շրջանի հարավային ուղղությամբ։ Դիտարկումն անցել է ըստ նախատեսված ժամանակացույցի։ Այս մասին հայտնում է Արցախի ԱԳՆ կայքը:
Դիտարկումն անցկացվել է Արցախի իշխանությունների հետ ձեռք բերված պայմանավորվածության համաձայն: ՊԲ դիրքերից դիտարկումն իրականացրել են ԵԱՀԿ գործող նախագահի անձնական ներկայացուցիչ (ԳՆԱՆ) դեսպան Անջեյ Կասպշիկը, նրա դաշտային օգնական Միխայիլ Օլարուն (Մոլդովա) և անձնական օգնական Սայմոն Թիլերը (Մեծ Բրիտանիա):
Ադրբեջանի կողմից դիտարկումն իրականացրել են ԵԱՀԿ ԳՆԱՆ դաշտային օգնական Օգնեն Յովիչը (Բոսնիա և Հերցեգովինա) և ԳՆԱՆ գրասենյակի աշխատակից Մարտին Շուստերը (Գերմանիա)։
Դիտարկման առաքելությանը ուղեկցել են Արցախի ԱԳՆ և ՊԲ ներկայացուցիչները:
Համաձայն Ադրբեջանի պաշտպանության նախարարության հաղորդագրության՝ դիտարկումն անցկացվել է առանց միջադեպերի:
Հիշեցնենք, որ դիտարկումից առաջ՝ մարտի 6-ին, ԵԱՀԿ գործող նախագահի անձնական ներկայացուցիչ, դեսպան Անջեյ Կասպշիկին Արցախում ընդունել էին ՊԲ հրամանատարը և ԱԳՆ ղեկավարը: