Մարտի 5-ին Թուրքիայի ժանդարմերիայի գլխավոր հրամանատարության հրապարակած զեկույցում նշվում է, որ այդ կառույցում ներկայում կա ընդհանուր 176 հազար 75 զինծառայող: Նշվածից սպաներ են 4540-ը: Մեծ մասը՝ 72122, շարքայիններ և եֆրեյտորներ են:
Թուրքիայի ժանդարմերիայի անձնակազմը 2017 թվականին.
- Սպա — 4540
- Պահեստազորի սպա — 1190
- Ենթասպա — 25914
- Պրոֆեսիոնալ ժանդարմ — 18526
- Պրոֆեսիոնալ եֆրեյտոր — 504434
- Եֆրեյտոր/շարքային — 72122
- Պետական աշխատող — 2539
- Այլ աշխատողներ (քաղաքացիական) — 810
- Ընդհանուր — 176065
Թուրքիայի ԶՈւ գլխավոր շտաբի կայքը բանակի, ժանդարմերիայի և առափնյա անվտանգության զինծառայողների թվաքանակի մասին տվյալներ հրապարակում էր մինչև 2016 թ. հուլիսի ռազմական հեղաշրջման փորձը: Միջադեպից հետո նշված երկու կառույցները ամբողջովին հանվեցին ԶՈւ ԳՇ ենթակայությունից և հանձնվեցին ներքին գործերի նախարարությանը: Դրանից հետո ժանդարմերիայի թվաքանակի վերաբերյալ հստակ տվյալներ չէին հրապարակվել:
2016 թ. հուլիսի վերջին զեկույցի համաձայն՝ ժանդարմերիայում կար 155 հազար զինծառայող: Սակայն, եթե ուշադիր անյենք տվյալներին, ապա պարզ երևում է, որ թեև ընդհանուր թվաքանակն աճել է, սակայն պակասել են սպաները, պրոֆեսիոնալ ժանդարմները:
Սպաների պակասը կապված է 2016 թ. նշված ռազմական հեղաշրջման փորձից հետո բանակից, ժանդարմերիայից մի քանի հազար սպաների ձերբակալության հետ:
Ժանդարմերիան Թուրքիայում բանակից հետո թվաքանակով և զինվածությամբ երկրորդ կառույցն է: Իրականացնում է ներքին զորքերի պարտականություններ՝ հիմնականում PKK-ի դեմ գործողություններում: Սակայն, դրան զուգահեռ, այս կառույցը նաև ներգրավվում է Թուրքիայի սահմանների մի մասի պաշտպանությանը, Սիրիայում իրականացվող ռազմագործողություններին: