Փետրվարի 21-ին տեղեկություններ են տարածվել, որ Սիրիայի Աֆրին շրջան է հասել կառավարական բանակի կողմից կռվող «Սիրիայի ժողովրդական ուժերի» երկրորդ խումբը: Այս մասին հայտնում է սիրիական պետական «ՍԱՆԱ» գործակալությունը:
Ըստ սիրիական գործակալության՝ պրոասադական ուժերը Աֆրինում են Թուրքիայի զինուժի ագրեսիայի և «Իսլամական պետություն» ահաբեկչական խմբավորման դեմ» պայքարելու համար:
Սիրիական աղբյուրները հայտնում են, որ պրոասադական ուժերի երկրորդ խումբը հասել է Աֆրին. նկարը՝ «ՍԱՆԱ» գործակալության
«ՍԱՆԱ» գործակալության թղթակիցը հայտնում է, որ «ժողովրդական ուժերի» նոր խումբը Աֆրին է հասել Հալեպ-Նուբոլ ճանապարհով: Աղբյուրը նաև հայտնում է, որ փետրվարի 20-ին Աֆրին մեկնած խումբը ենթարկվել է Թուրքիայի զինուժի հրետակոծությանը:
Ավելի վաղ տեղեկությունը տարածվել է նաև սոցցանցերում:
Second batch of NDF begin entering Afrin region via Ziyarah crossing while Turkish reconnaissance drones fly overhead
— Hassan Ridha (@sayed_ridha) February 21, 2018
Միևնույն ժամանակ քուրդ-արաբական ուժերի կազմված «Սիրիայի դեմոկրատական ուժեր» (SDF) խմբավորման հրամատարությունը հայտարարել է, որ Թուրքիայի զինուժի հրետակածության հետևանքով սպանվել է Դամասկոսի հովանավորյալ ուժերի 2 մարտիկ, 3-ն էլ վիրավորվել են և հոսպիտալացվել: Փոխանցում է ռուսաստանյան «ՌԻԱ Նովոստի» գործակալությունը:
Հիշեցնենք, որ փետրվարի 20-ին Սիրիայի կառավարական բանակի կողմից կռվող ուժերը մտել են Աֆրին: Ավելի ուշ թուրքական կողմը հայտարարել է, որ իրենք հրետակոծել են սիրիական ուժերին, ինչի հետևանքով դրանք հեռացել են Աֆրինից: Տարածվել էին նաև տեսանյութեր հրետակածությունից: Սակայն հնարավոր չէ վստահորեն պնդել, որ պրոասադական ուժերը հեռացել են: Այս մասին առավել մանրամասն այստեղ:
Աֆրին սիրիական բանակի հովանավորյալ ուժերին ուղարկելու մասին տեղեկությունների տարածումից հետո թուրքական կողմը հայտարարեց, որ Թուրքիայի զինուժին ոչինչ չի կարող կանգնեցնել:
Հավելենք, որ Թուրքիան Աֆրինում քրդական «Ժողովրդական ինքնապաշտպանության ջոկատների»՝ YPG-ի, դեմ գործողությունը սկսել է հունվարի 20-ից: Գործողությանը ներգրավված են թուրքական զինուժը, ժանդարմերիան, նրանց աջակցող զինյալները:
Դատելով արդեն մեկ ամիս շարունակվող գործողությունից՝ Թուրքիան բավականին մեծ թվով կորուստներ է կրել, այդ թվում՝ տեխնիկայի: Թուրքիան արդեն իսկ կորցրել է առնվազն 34 զինծառայող: Բացի այդ, Թուրքիայի կողմից հիմնական ցամաքային գործողություններին ներգրավված են Թուրքիայի հովանավորյալ զինյալներ, որոնց կորուստների մասին չի հայտարարվում:
