Փետրվարի 14-ին Թուրքիայի հարավարաևելյան Դիարբեքիր նահանգի նահանգապետարանը հայտարարել է, որ ուժայինները գործողություն են սկսում «Քրդստանի աշխատավորական կուսակցության» (PKK) զինյալների դեմ նահանգի մի քանի գավառներում: Փոխանցում է թուրքական պետական «Անադոլու» գործակալությունը:
Թուրքական ուժայինները Դիարբեքիրի Սուր գավառում. Հունվարի 31, 2016 թ.
Գործողությունները մասնավորապես տարածվելու են նահանգի Քուլփ, Սիլվան, Հազրո, Լիջե գավառների լեռնային և անտառային հատվածներում: Նահանգապետարանը «անվտանգության նկատառումներից ելնելով»նահանգում մի շարք բնակավայրերում «փողոց դուրս գալու» արգելք է հայտարարել:
Նշենք, որ Թուրքիայի ուժայինների և քուրդ զինյալների բախումները որոշակի հարաբերական դադարից հետո վերսկսել են դեռևս 2015-ի ամռանից: Արդեն 2,5 տարի շարունակվող բախումներում երկու կողմերն էլ ունեն մեծ կորուստներ:
Դիարբեքիր նահանգը թուրք-քրդական բախումների առավել ակտիվ կենտրոններից մեկն է: Ուժայինները այստեղ հաճախ են գործողություններ իրականացնում PKK-ի դեմ: Բախումների հետևանքով նահանգը մեծ նյութական վնասներ է կրել, քաղաքների և բնակավայրերի մի մասը ավերակների է վերածվել:
Թուրքիայի Դիարբեքիր նահանգի Սուր գավառում ուժայինների և քրդերի բախումներում ավերված շինությունների ընդհանուր պատկերը