Փետրվարի 6-ին Ռումինիայում ՀՀ դեսպան Սերգեյ Մինասյանը հանդիպել է Ռումինիայի ազգային պաշտպանության նախարար Միհայ-Վիորել Ֆիֆորի հետ: Կողմերը անդրադարձել են ռազմական համագործակցության հնարավոր ուղղություններին: Այս մասին հայտնում է ՀՀ ԱԳՆ կայքը:
Դեսպան Մինասյանը նշել է նաև միջազգային ռազմական և ռազմաքաղաքական համագործակցության կարևորությունը Հայաստանի համար՝ երկրի զինված ուժերի արդիականացման և զարգացման գործընթացի լույսի ներքո՝ ընդգծելով, որ երկկողմ շփումները կնպաստեն ռազմական համագործակցության հնարավոր ուղղությունների ուրվագծելուն:
Նախարար Ֆիֆորը ողջունել է երկխոսության խթանման և երկկողմ օրակարգի ձևավորման գաղափարը, որը կարող է ընդգրկել նաև ռազմական և պաշտպանական ոլորտի կրթությունը, ռազմական բժշկությունը և այլ բնագավառներ:
Անդրադարձ է կատարվել ղարաբաղյան հակամարտությանը և նշվել, որ խնդրի կարգավորումը պետք է ընթանա բացառապես բանակցությունների միջոցով, երկխոսության ճանապարհով՝ հիմնախնդրի կարգավորման միջազգային մանդատ ունեցող միակ ձևաչափի՝ ԵԱՀԿ Մինսկի խմբի համանախագահության շրջանակներում:
Նախարար Ֆիֆորը հայտնել է նաև, որ Ռումինիայի նոր կառավարության ձևավորումից և ազգային պաշտպանության նախարարի պաշտոնում իր վերանշանակումից հետո սա իր առաջին հանդիպումն է օտարերկրյա դեսպանի հետ: