Սիրիացի ուժայինների հաշվարկներով՝ այդ երկրում կռվող տարբեր հակաիշխանական զինյալ խմբավորումները ՌԴ ավելի քան 1500 քաղաքացու հավաքագրել են միայն համացանցի միջոցով. Փետրվարի 6-ին հայտնել է Ռուսաստանի Քննչական կոմիտեի նախագահ Ալեքսանդր Բաստիրկինը: Փոխանցում է ռուսաստանյան «ՌԻԱ Նովոստի» լրատվական գործակալությունը:
Բաստիրկինը հանդիպել է իր սիրիացի գործընկերների հետ: Նրանք նշել են, որ Ռուսաստանի այդ 1500 քաղաքացին էլ կռվել են Սիրիայի կառավարության դեմ:
«Իսլամական պետություն» ահաբեկչական խմբավորման զինյալներ
«Իզվեստիան» էլ իր հերթին հիշեցնում է, որ 2017 թ. ամերիկյան Soufan Center ընկերության հրապարակած տվյալներով՝ Ռուսաստանը ահաբեկչական խմբավորումների անդամների «խոշորագույն մատակարարն է». ահաբեկչական խմբավորումների կազմում կռվում է ՌԴ 3417 քաղաքացի: Սակայն ՌԴ նախագահի խոսնակ Դմիտրի Պեսկովը այդ տվյալներն անվանել է ոչ վստահելի:
Հիշեցնենք, որ ավելի վաղ՝ 2017 թ. մարտին, ՀԱՊԿ գլխավոր քարտուղարի պաշտոնակատար Վալերի Սեմերիկովը հայտարարել էր, որ Սիրիայում ահաբեկչական խմբավորումների շարքերում կռվում է Ռուսաստանի շուրջ 2000-2500 քաղաքացի:
Այս մասով տվյալները միշտ էլ հակասական են եղել. 2017 թ. փետրվարին էլ ՌԴ նախագահ Վլադիմիր Պուտինը նշել էր, որ Սիրիայում զինյալների կողմից իրենց 4000 քաղաքացի է կռվում:
Ամեն դեպքում պարզ է, որ 2011 թ. սկսած Ռուսաստանի առնվազն մի քանի հազար քաղաքացիներ անդամակցել են հատկապես Սիրիայում գործող ահաբեկչական, զինյալ խմբավորումների: Ռուսաստանը հենց նշվածը, ինչպես նաև նրանց վերադարձի վտանգն էր նշում որպես Սիրիայում ռազմագործողություն սկսելու հիմնական պատճառներից մեկը: